ភ្នំពេញ៖ នគរបាលរាជធានីភ្នំពេញ បានឃាត់ខ្លួនបុរសម្នាក់ ដែលអាជ្ញាធរបញ្ជាក់ថា ជាម្ចាស់គណនីហ្វេសប៊ុក «Hok Nave» ក្រោយមានការបែកធ្លាយ និងចែកចាយសំឡេងតាមបណ្តាញសង្គម ដែលត្រូវបានចោទថា មានខ្លឹមសារមើលងាយកងទ័ព និងប៉ះពាល់កិត្តិយសស្ត្រីម្នាក់។
ស្នងការនគរបាលរាជធានីភ្នំពេញ លោកឧត្តមសេនីយ៍ឯក ជួន ណារិន្ទ បានបញ្ជាក់ថា: បន្ទាប់ពីទទួលបានព័ត៌មានពាក់ព័ន្ធករណីនេះ លោកបានបញ្ជាឱ្យកម្លាំងជំនាញចុះស្រាវជ្រាវ រហូតកំណត់អត្តសញ្ញាណ និងឈានដល់ការឃាត់ខ្លួនម្ចាស់គណនីខាងលើ។
លោកស្នងការបញ្ជាក់ថា បុរសរូបនេះមានឈ្មោះ គឹម ភិរម្យ ជាម្ចាស់គណនីហ្វេសប៊ុក «Hok Nave» ដែលកំពុងមានការចែកចាយ និងជជែកវែកញែកយ៉ាងច្រើនលើបណ្តាញសង្គម ពាក់ព័ន្ធនឹងសំឡេងដែលត្រូវបានចាត់ទុកថា ប៉ះពាល់ដល់កិត្តិយសកងទ័ព និងស្ត្រីម្នាក់។
លោក ជួន ណារិន្ទ បានឱ្យដឹងថា: សមត្ថកិច្ចបានឃាត់ខ្លួន គឹម ភិរម្យ កាលពីល្ងាចថ្ងៃទី២៣ ខែកញ្ញា ឆ្នាំ២០២៦ ហើយកំពុងបន្តនីតិវិធីសួរនាំ និងស្រាវជ្រាវពាក់ព័ន្ធករណីនេះ។
សមត្ថកិច្ចមិនទាន់បញ្ជាក់ពីបទចោទប្រកាន់ ឬវិធានការផ្លូវច្បាប់បន្ថែមចំពោះបុរសរូបនេះនៅឡើយទេ ខណៈនីតិវិធីកំពុងបន្ត៕រក្សាសិទ្ធិគ្រប់យ៉ាងដោយ CEN
