ឯកឧត្តម ហេង រតនា អគ្គនាយកស៊ីម៉ាក់បានបញ្ជាក់ប្រាប់មន្ត្រីជាន់ខ្ពស់កាកបាទក្រហមអន្តរជាតិលោក Alain Aeschlimann ថា គ្រាប់បែបចង្កោមដែលថៃបានប្រើប្រាស់ក្នុងសង្គ្រាមជាមួយកម្ពុជាវាលើសអ៊ីស្រាអ៊ែលប្រើប្រាស់ក្នុងសង្គ្រាមលីបង់កាលពីឆ្នាំ២០០៦ទៅទៀត ធ្វើឱ្យគ្រាប់បែកចង្កោមដែលថៃប្រើប្រាស់នេះមានទំហំច្រើនជាងគេលើពិភពលោក។
ឯកឧត្តម ហេង រតនា បានបញ្ជាក់ប្រាប់លោក Alian នៅក្នុងកិច្ចប្រជុំមួយនៅស្នាក់ការកណ្ដាលស៊ីម៉ាក់ថា គ្រាប់បែកចង្កោមដែលថៃបានប្រើជាប្រភេទគ្រាប់ស៊េរីថ្មី m42 M46 និងM85 ដែលមានចំនួនប្រហែល៦ទៅ៧លានកូនគ្រាប់ ដែលកំពុងស្ថិតនៅរាយប៉ាយតាមភូមិឋានស្រែចម្ការរបស់ប្រជាពលរដ្ឋកម្ពុជាចំនួន៣៣៥ភូមិ ដែលជាចំនួនដ៏ច្រើនលើសលប់បើធៀបនឹងសង្គ្រាមលីបង់-អ៊ីស្រាអ៊ែល ឆ្នាំ២០០៦ ដែលពេលនោះអ៊ីស្រាអ៊ែលប្រើគ្រាប់បែកចង្កោមចំនួន៤លានគ្រាប់ ។
ឯកឧត្តមបានបន្តទៀតថា៖ «ទំហំបញ្ហាគ្រាប់បែកសេរីថ្មីដែលកើតឡើងនៅមាតុភូមិកម្ពុជានេះ មានទំហំច្រើនជាងគេនៅលើពិភពលោកយើងនេះ» ។របាយការណ៍នេះនៅមិនទាន់រាប់ចំនួនដែលថៃទម្លាក់គ្រាប់បែកចង្កោមនៅភូមិចំនួន១៤នៅទីតាំងជួរមុខនៅឡើយទេ ។ឯកឧត្តម ហេង រតនា បានបន្ថែមថាការបាញ់ពង្រាយគ្រាប់បែកចង្កោមរបស់ថៃបានធ្លាក់នៅតាមសាលារៀន ភូមិឋាន វត្តអារាម ស្រែចម្ការប្រជាពលរដ្ឋ និងហេដ្ឋារចនាសម្ព័ន្ធស៊ីវិលសាធារណៈ ដែលជាចេតនារបស់ថៃក្នុងការ «បង្កវិបត្តិមនុស្សធម៌និងគំរាមកំហែងសេដ្ឋកិច្ចធ្ងន់ធ្ងរចំពោះកម្ពុជា ហើយជាទង្វើរំលោភបំពានអនុសញ្ញាអន្តរជាតិហាមឃាត់ការប្រើប្រាស់គ្រាប់បែកចង្កោម» ៕រក្សាសិទ្ធិដោយ៖សុទ្ធលី
