រាជធានីភ្នំពេញ÷ នាយកដ្ឋាននគរបាលព្រហ្មទណ្ឌ បានបង្ហាញមុខជនសង្ស័យម្នាក់ ជាមុខសញ្ញាជនឆបោក ជំនាញខាងទិញម៉ូតូគេ រួចធ្វើជាសុំជិះសាក ហើយជិះគេចខ្លួនបាត់ !នៅពេលនេះ សមត្តកិច្ចចាប់មកសួរចម្លើយ មិនមែនតែមួយលើកទេ គឺកន្លងមកធ្លាប់ធ្វើសកម្មភាពចំនួន០៣ លើកមកហើយ ។
ដោយអនុវត្តតាមបទបញ្ជារបស់លោក ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ នៅថ្ងៃទី១៨ ខែសីហា ឆ្នាំ២០២៦ វេលាម៉ោង១៦:១០នាទីល្ងាច លោក ឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន ,លោក វរសេនីយ៍ឯក ញ៉ែម វ៉ន នាយការិយាល័យ បានដឹកនាំ កម្លាំងជំនាញការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានធ្វើការឃាត់ខ្លួនជនសង្ស័យម្នាក់ ត្រង់ចំណុចស្ថានីប្រេងឥន្ធនៈ កាល់តិច តាមបណ្តោយមហាវិថីព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ។
ជនសង្ស័យពាក់ព័ន្ធករណីឆបោក (ម៉ូតូចំនួន០២គ្រឿង) កាលពីថ្ងៃទី១៣ ខែសីហា ឆ្នាំ២០២៦ និងថ្ងៃទី១៤ ខែសីហា ឆ្នាំ២០២៦ ត្រង់ចំណុចចំហៀងសាកលវិទ្យាល័យកម្ពុជា-ចិន (អតីតផ្សារសុវណ្ណា) សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
ជនសង្ស័យឈ្មោះ ហេង វិចិត្រ ភេទប្រុស អាយុ៤១ ឆ្នាំ ជនជាតិខ្មែរ។
សម្ភារៈដកហូត :
១- ម៉ូតូម៉ាក ហុងដា ស្កុបពី ពណ៌ស ឆ្នាំផលិត២០១៨ ពាក់ស្លាកលេខ ភ្នំពេញ 1JR-6028 ។
២- ម៉ូតូម៉ាក ហុងដា ស្កុបពី ពណ៌ស-បៃតង ឆ្នាំផលិត២០២៥ ពាក់ស្លាកលេខ ភ្នំពេញ 1LS-1811 (បានប្រគលជូនជនរងគ្រោះ)។
៣- ម៉ូតូម៉ាក ហុងដា ស្កុបពី ពណ៌ក្រហម ឆ្នាំផលិត២០២៣ ពាក់ស្លាកលេខ ភ្នំពេញ 1KK-1539 (បានប្រគលជូនជនរងគ្រោះ)។
ក្រោយពីចាប់ខ្លួនជនសង្ស័យបានឆ្លើយថា : គេធ្លាប់សកម្មភាព ដូចខាងលើនេះ (ឆបោកម៉ូតូប្រជាពលរដ្ឋបានចំនួន០៣លើកមកហើយ) ។
លើកទី១- ធ្វើសកម្មភាព ឆបោកបានម៉ូតូម៉ាក ហុងដា ស្គុបពី ពណ៌ស-បៃតង មួយគ្រឿង ឆ្នាំផលិត២០២៥ ពាក់ស្លាកលេខ ភ្នំពេញ 1LS-1811។
លើកទី២- ធ្វើសកម្មភាព ឆបោកបានម៉ូតូហុងដា ស្កុបពី ពណ៌ក្រហម មួយគ្រឿង ឆ្នាំផលិត២០២៣ ពាក់ស្លាកលេខ ភ្នំពេញ 1KK-1539។
លើកទី៣- ធ្វើសកម្មភាពនៅ ក្នុងទឹកដីខណ្ឌជ្រោយចង្វារ បានម៉ូតូម៉ាក ហុងដា PCX មួយគ្រឿង (មិនមានបណ្តឹង )។
បច្ចុប្បន្ន ជនសង្ស័យត្រូវបានសមត្តកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ តាមនីតិវិធីច្បាប់ ។ ចំណែកម៉ូតូរបស់ជនរងគ្រិះបានប្រគល់ឲ្យម្ចាស់វិញ! ៕ រក្សាសិទ្ធដោយ៖សុទ្ធលី
