រាជធានីភ្នំពេញ÷ នារីបម្រើការនៅតាមហាង០១នាក់ ត្រូវបានសមត្ថកិច្ច ខណ្ឌសែនសុខ ឃាត់ខ្លួន! បន្ទាប់ពីចាក់សម្លាប់បុរស ជាសង្សាររបស់ខ្លួន ០១កាំបិត ចំក្បាលពោះបណ្ដាលឲ្យស្លាប់បាត់បង់ជីវិត ។
ករណីខាងលើនេះបានកើតឡើងនៅវេលាម៉ោង ០៣:៣០នាទី ទៀបភ្លឺ ថ្ងៃទី១៩ ខែសីហា ឆ្នាំ២០២៦ នៅចំណុចបន្ទប់ជួល ផ្លូវបេតុង ភូមិស្លែងរលើង សង្កាត់អូរបែកក្អម ខណ្ឌសែនសុខ រាជធានីភ្នំពេញ។
នារីជាជនសង្ស័យឃាតកររូបនេះ ឈ្មោះ ជឹម ស្រីអូន ភេទស្រី អាយុ២៨ឆ្នាំ ជនជាតិខ្មែរ មុខរបរ បុគ្គលិកហាង ស្នាក់នៅបន្ទប់ជួលជាន់ទី២ ផ្លូវបេតុង សង្កាត់អូរបែកក្អម ខណ្ឌសែនសុខ កន្លែងកើតហេតុ ខាងលើ ។ ចំណែកបុរសជាសង្សារ ដែលបានស្លាប់បាត់បង់ជីវិត ឈ្មោះ បុង សារិក ភេទប្រុស អាយុ៣៧ឆ្នាំ ជនជាតិខ្មែរ មុខរបរ លក់ដូរ ស្នាក់នៅបន្ទប់ជួលកន្លែងកើតហេតុខាងលើ និងមានស្រុកកំណើតភូមិ គ្រផល ឃុំគុស ស្រុកត្រាំកក់ ខេត្តតាកែវ។
ទាក់ទិននឹងឃាតកម្មចាក់សម្លាប់សង្សារនេះគេពុំទាន់ដឹងពីមូលហេតុពិតប្រាកដឡើយ នោះទេ។
តាមព័ត៌មានបឋម នារីបង្កបានឲ្យដឹងថា ខ្លួនបានចាក់សម្លាប់ខ្លួនឯង ហើយត្រូវបានសង្សាររបស់ខ្លួនទៅឃាត់ ក៏បណ្ដាលឲ្យខ្លួនគ្រវាសដៃត្រូវចំក្បាលពោះ០១កាំបិត ហើយជនរងគ្រោះក៏បានសម្រាកនៅក្នុងបន្ទប់ជួល ។លុះក្រោយមក ក៏បានដាច់ខ្យល់ស្លាប់បង្កឲ្យមានការភ្ញាក់ផ្អើលដល់ប្រជាពលរដ្ឋនៅជិតខាង ហើយត្រូវបានសមត្ថកិច្ច ចុះពិនិត្យដល់កន្លែងកើតហេតុភ្លាមៗ៕រក្សាសិទ្ធដោយ៖សុទ្ធលី
