មណ្ឌលគិរី៖ សមត្ថកិច្ចការិយាល័យប្រឆាំងគ្រឿងញៀនបានសហការជាមួយកម្លាំងអធិការនគរបាល ក្រុងសែនមនោរម្យ ធ្វើការបង្ក្រាបស្រ្តីម្នាក់ក្នុងករណីជួញដូរបារីអេឡិចត្រូនិច ស្ថិតនៅត្រង់ចំណុចផ្ទះរបស់ឈ្មោះ សុខ នី ភេទ ស្រីស្ថិតនៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី កាលពីវេលាម៉ោង ១៩និង០០នាទី កាលពីថ្ងៃទី២០ ខែសីហា ឆ្នាំ២០២៤ដោយមានការសម្របសម្រួលនីតិវិធីដោយ លោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី និងមានការចូលរួមពីអាជ្ញាធរមូលដ្ឋាន លោក សុខ សារឿន ចៅសង្កាត់រង និងលោក វ៉ាន់ ធារី សមាជិកភូមិកណ្តាល។
ក្នុងប្រតិបត្តិការខាងលើនេះកម្លាំងសមត្ថកិច្ចជំនាញយើងបានធ្វើការនាំខ្លួនស្រ្តីជួញដូរបារីអេឡិចត្រូនិច ចំនួន ១នាក់ មកធ្វើការសួរនាំស្រ្តីខាងលើមានឈ្មោះដូចខាងក្រោម ៖ឈ្មោះ សុខ នី ភេទ ស្រី អាយុ ២៦ឆ្នាំ ជនជាតិខ្មែរ មុខរបរលក់ដូរ មានទីលំនៅបណ្ដោះអាសន្ននៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។ បានធ្វើតេស្តរកសាធាតុញៀន ក្នុងទឹកម៉ូត្រជាលទ្ធផលអវិជ្ជមាន(-)។សម្ភារ:និងវត្ថុតាងដែលកម្លាំងសមត្ថកិច្ចចាប់យករួមមាន បារីអាឡិចត្រូនិច ចំនួន ២៨គឿង ។
ក្បាលបារីអេឡិចត្រូនិចមានទឹកសម្រាប់ជក់ ម៉ាក Yooz ចំនួន ១៧ប្រអប់ ស្មើនឹង ៣៤ដើម ។
បច្ចុប្បន្នស្រ្តីដែលមានឈ្មោះខាងលើត្រូវបានកម្លាំងជំនាញការិយាល័យ ប្រឆាំងគ្រឿងញៀននិងកម្លាំងអធិការដ្ឋាននគរបាល ក្រុងសែនមនោរម្យ បានធ្វើការអប់រំណែនាំឲ្យបញ្ឈប់ការជួញដូរ និងប្រើប្រាស់បារីអេឡិចត្រូនិចនេះ បន្តទៀត ចំណែកវត្ថុតាង កម្លាំងជំនាញការិយាល័យប្រឆាំងគ្រឿងញៀន ដកហូតមករក្សាទុកដើម្បីចាត់ការតាមនីតិវិធី៕រក្សាសិទ្ធដោយ ៖ សុទ្ធលី
