កំពង់ស្ពឺ ៖ បុរសចំណាស់ជាជីតា និងជីដូន ព្រមទាំងចៅតូច ចំនួន៣នាក់ បានស្លា.ប់ភ្លាមៗនៅក្នុងបន្ទប់ទឹក ខណៈដែលឆ្លងចរន្តអគ្គិសនី ដែលប៉ះជញ្ជាំងស័ង្កសីបន្ទប់ទឹក ។
ហេតុការណ៍នេះបង្កឱ្យមានការភ្ញាក់ផ្អើល ដល់ប្រជាពលរដ្ឋ និងសមត្ថកិច្ច នៅវេលាម៉ោង១៣និង៣០នាទីរសៀលថ្ងៃទី០៥ ខែកក្កដា ឆ្នាំ២០២៤ ស្ថិតក្នុងភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ។
មូលហេតុដំបូង យាយយកចៅស្រី ទៅងូតទឹកឲ្យ នៅក្នុងបន្ទប់ ស្រាប់ឆ្លងចរន្តអគ្គិសនីឆក់ជីដូន និងចៅ ។ ពេលនោះ ជនរងគ្រោះជាត្រូវជាជីតា បានឃើញ ក៏រត់ចូលទៅជួយ ប៉ុន្តែជាអកុសល ត្រូវឆក់ស្លា.ប់ទាំង៣នាក់ តែម្តងដោយសារ ខ្សែភ្លើង រលាត់កកិតប៉ះជាមួយស័ង្កសីជញ្ជាំងបន្ទប់ទឹក ។
បើតាមប្រភពពីសមត្ថកិច្ចក្រុងច្បារមន បានឲ្យដឹងថា ករណីឆក់បណ្តាលឲ្យ ស្លាប់មនុស្សចំនួន០៣នាក់មានឈ្មោះ ឡា ណែន អាយុ៥១ឆ្នាំ ប្តី និងប្រពន្ធឈ្មោះ ណិន សុន អាយុ៤៧ឆ្នាំ ព្រមទាំងចៅស្រី ឈ្មោះ អូន សុវណ្ណខេម៉ា អាយុ៦ខែ។
ជុំវិញករណីនេះសមត្ថកិច្ចបានសន្និដ្ឋានថា មូលហេតុឆ្លងចរន្តអគ្គិសនី នៅក្នុងបន្ទប់ទឹកពីម៉ាស៊ីនបោកខោអាវ មកស័ង្កសីដែល ជនរងគ្រោះបានតោងងូតទឹក។
មន្ត្រីនគរបាលជំនាញបច្ចេកទេស ធ្វើការពិនិត្យកោសល្យវិច័យថា ជនរងគ្រោះ ពិតជាស្លាប់ ដោយសារឆក់ចរន្តអគ្គិសនី ពិតប្រាកដមែន ។
នាព្រឹកថ្ងៃសៅរ៍ ទី៦ ខែកក្កដា ឆ្នាំ២០២៤ ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្ដមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងលោកជំទាវ បានអញ្ជើញចូលរួមរំលែកទុក្ខដល់គ្រួសារសពដែលបាត់បង់ជាទីស្រឡាញ់ទាំង៣នាក់ ក្នុងឧបទ្ទវហេតុឆ្លងចរន្តអគ្គិសនី ស្ថិតនៅក្នុងភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ដែលពិធីនេះបុណ្យសពនេះធ្វើក្នុងបរិវេណវត្តរំលេចសំបួរ ៕រក្សាសិទ្ធដោយ ៖ សុទ្ធលី
