ភ្នំពេញ៖ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានដឹកនាំគណៈប្រតិភូមន្ត្រីជំនាញច្បាប់កម្ពុជា ទៅចូលរួមកិច្ចប្រជុំលើកទី២ នៃគណៈកម្មការផ្សះផ្សា ដើម្បីពិភាក្សាដោះស្រាយវិវាទដែនសមុទ្ររវាងកម្ពុជា និងថៃ នៅទីក្រុងឡាអេ ប្រទេសហូឡង់ ដោយកម្ពុជាបានបញ្ជាក់ជាថ្មីនូវលក្ខខណ្ឌសំខាន់ចំនួន៣ សម្រាប់ដំណោះស្រាយវិវាទនេះ។
យោងតាម សេចក្តីប្រកាសព័ត៌មានរបស់ក្រសួងការបរទេស លោក ប្រាក់ សុខុន បានចេញដំណើរនៅល្ងាចថ្ងៃទី១១ ខែតុលា ឆ្នាំ២០២៦នេះ ក្នុងនាមជាភ្នាក់ងាររបស់រាជរដ្ឋាភិបាលកម្ពុជា ដើម្បីចូលរួមកិច្ចប្រជុំដែលគ្រោងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៨ ខែតុលា ឆ្នាំ២០២៦។
លក្ខខណ្ឌទាំង៣ ដែលកម្ពុជាបានលើកឡើង រួមមាន: ការបង្កើតសន្ធិសញ្ញារួមគ្នាស្តីពីព្រំដែនសមុទ្រ ការបង្កើតកិច្ចព្រមព្រៀងស្តីពីការអភិវឌ្ឍរួមគ្នា និងការសម្រេចអនុសាសន៍របស់គណៈកម្មការផ្សះផ្សា។
ក្រសួងការបរទេសបានបញ្ជាក់ថា លក្ខខណ្ឌទាំងនេះត្រូវបានលោក ប្រាក់ សុខុន ប្រកាសជាសាធារណៈរួចមកហើយ ក្នុងពិធីបើកកិច្ចប្រជុំលើកទី១ នៃគណៈកម្មការផ្សះផ្សា កាលពីព្រឹកថ្ងៃទី១៥ ខែកញ្ញា ឆ្នាំ២០២៦។
កិច្ចប្រជុំលើកទី២ នៅទីក្រុងឡាអេ គឺជាផ្នែកមួយនៃដំណើរការផ្សះផ្សាក្រោមអនុសញ្ញាអង្គការសហប្រជាជាតិស្តីពីនីតិសមុទ្រ ដែលមានគោលបំណងស្វែងរកដំណោះស្រាយចំពោះវិវាទដែនសមុទ្ររវាងកម្ពុជា និងថៃ តាមរយៈយន្តការផ្សះផ្សាអន្តរជាតិ។
ការបញ្ជាក់ជាថ្មីនូវលក្ខខណ្ឌទាំងបីនេះ បង្ហាញពីការបន្តរក្សាជំហររបស់កម្ពុជាចំពោះដំណើរការដោះស្រាយវិវាទដែនសមុទ្រ ខណៈគណៈកម្មការផ្សះផ្សាត្រៀមបន្តកិច្ចពិភាក្សារវាងភាគីទាំងពីរនៅប្រទេសហូឡង់។រក្សាសិទ្ធិគ្រប់យ៉ាងដោយ CEN
