សម្តេចធិបតីនាយករដ្ឋមន្រ្តី ៖ កម្ពុជានឹងជួបជាមួយភាគីអាមេរិកម្ដងទៀត ដើម្បីចរចាពីបញ្ហាពន្ធគយ

សម្ដេចធិបតី ហ៊ុន ម៉ាណែត បានបញ្ជាក់ថា នៅថ្ងៃស្អែកកម្ពុជានឹងជួបជាមួយភាគីអាមេរិកម្ដងទៀត ដើម្បីចរចាពីបញ្ហាពន្ធគយ ដែលនេះជាជំនួបលើកទី២ ក្រោយជួបលើកទី១ កាលពីថ្ងៃទី១៦ ខែមេសា ឆ្នាំ២០២៥ ។

សម្ដេចធិបតី ហ៊ុន ម៉ាណែត បញ្ជាក់យ៉ាងដូច្នេះក្នុងពេលអញ្ជើញជាអធិបតី ក្នុងកម្មវិធីសំណេះសំណាលជាមួយមន្ត្រីរាជការ បុគ្គលិក កម្មករ និយោជិត កំពង់ផែស្វយ័តក្រុងព្រះសីហនុ នាព្រឹកថ្ងៃទី០១សភានេះ ក្នុងឱកាសអបអរសាទរខួបអនុស្សាវរីយ៍ លើកទី១៣៩ នៃទិវាពលកម្មអន្តរជាតិ ១ ឧសភា ឆ្នាំ២០២៥។

សម្តេចធិបតី បានថ្លែងថា ក្រុមការងាររាជរដ្ឋាភិបាលកម្ពុជា បានជួបប្រធានតំណាងពាណិជ្ជកម្មរបស់អាមេរិកម្ដងរួចហើយ កាលពីថ្ងៃទី១៦ ខែមេសា កន្លងទៅនេះ ដែលនេះជាការទទួលខុសត្រូវរបស់រាជរដ្ឋាភិបាល ខណៈនៅថ្ងៃស្អែកនេះ ក្រុមការងារកម្ពុជានឹងមានការចរចាម្ដងទៀតជាមួយអាមេរិក។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ការចរចាបញ្ហាពន្ធគយ លើអតិរេកពាណិជ្ជកម្ម ជាមួយសហរដ្ឋអាមេរិក គឺជារឿងដ៏ស្មុគស្មាញខ្លាំងបំផុត តែទោះបីជាយ៉ាងណាក៏ដោយ កម្ពុជា នឹងខិតខំធ្វើយ៉ាងណា មិនថាលំបាកយ៉ាងណា ត្រូវបន្តចរចាជាមួយអាម៉េរិក ដើម្បីការពារផលប្រយោជន៍ ពាណិជ្ជកម្ម សេដ្ឋកិច្ចរបស់ប្រជាពលរដ្ឋ ជាពិសេសសេដ្ឋកិច្ចកម្ពុជា ដែលពឹងផ្អែកលើការនាំចេញ ។

សម្តេចធិបតី បានគូសបញ្ជាក់ថា នៅពេលណាដែលពាណិជ្ជកម្មមានបញ្ហា ការនាំចេញក៏មានបញ្ហា ទំនិញឆ្លងកាត់ក៏មានបញ្ហា ការកាត់បន្ថយឬមួយបង្កើន បើលំហូរកាន់តែប្រសើរ ការងារកាន់តែច្រើន ដែលទាំងអស់នេះ គឺជាកិច្ចការងារដ៏ស្មុគស្មាញ ខណៈដែលមកដល់ម៉ោងនេះ មិនទាន់មានប្រទេសណាមួយ ចរចាត្រូវជាមួយអាម៉េរិកនោះទេ សូម្បីប្រទេសជប៉ុន ដែលជាមហាអំណាច និងជាសម្ព័ន្ធមិត្តជិតស្និទ្ធជាមួយអាម៉េរិក នៅមិនទាន់ចរចាត្រូវផង ។

សម្តេចធិបតី បានពន្យល់ថា ហេតុអ្វីបានជាការចរចាពាណិជ្ជកម្ម ជារឿងស្មុគស្មាញ ដោយសារតែការចរចានេះ បើកាលណាចរចាជាមួយអាម៉េរិកមួយ ក៏ត្រូវចរចាជាមួយបណ្តាប្រទេសផ្សេងទៀត ដោយសារត្រូវជាប់ពាក់ព័ន្ធ ជាមួយគោលការណ៍ របស់ WTO ដែលមានសមាជិកជាច្រើនពីបណ្តាប្រទេសនានា លើពិពភលោក ។

សម្តេចធិបតី ថ្លែងថា «សម្រាប់កម្ពុជា យើងខិតខំទោះបីជាស្មុគស្មាញយ៉ាងណាក៏ដោយ ទោះបីជាលំបាកយ៉ាងម៉េចក៏ដោយ ក៏យើងបានចាត់វិធានការ និងត្រៀមលក្ខណៈបន្តទៀត ដើម្បីធ្វើកិច្ចការងារនេះ គោលដៅការពារផលប្រយោជន៍ ពាណិជ្ជកម្ម សេដ្ឋកិច្ចរបស់ប្រជាពលរដ្ឋ ជាពិសេសសេដ្ឋកិច្ចយើង ដែលពឹងផ្អែកលើការនាំចេញ ចឹងគឺធ្វើយ៉ាងម៉េចធានាគាំទ្រទៅដល់ការងារប្រជាពលរដ្ឋ សេដ្ឋកិច្ចរបស់យើង ដើម្បីហោប៉ៅរបស់ប្រជាពលរដ្ឋ នៅរក្សាបាននេះគឺជាគោលដៅធំរបស់យើង» ។

សម្តេចធិបតី បានថ្លែងឱ្យដឹងថា មកដល់ម៉ោងនេះ ក្រុមការងារចរចាកម្ពុជា បានជួបជាមួយប្រធានតំណាងពាណិជ្ជកម្មអាម៉េរិកបានម្តងហើយ កាលពីថ្ងៃទី១៦ មេសា ខណៈដែលថ្ងៃទី២ ខែឧសភាស្អែកនេះ នឹងត្រូវជួបម្តងទៀត ឈានទៅដល់ការចរចាបន្តិចម្តងៗ ដោយសារតែអាម៉េរិក ត្រូវប្រើពេលយូរ ក្នុងការចរចាជាមួយបណ្តាប្រទេសនានា ជិត២០០ប្រទេស ។

សម្តេចធិបតី មានប្រសាសន៍បន្ថែមថា បន្តិចម្តងៗ យើងនៅរង់ចាំពេលវេលា ហើយពេលណាដែលគេឱ្យយើងឡើងទៅអាម៉េរិកយើងនឹងទៅភ្លាម ដើម្បីត្រៀមហើយយើងចាត់ដល់ថ្នាក់ឧបនាយករដ្ឋមន្ត្រី ដើម្បីធានាការធ្វើកិច្ចការងារនេះ ជាកម្រិតខ្ពស់បំផុតហើយ ក្រៅពីប្រមុខរដ្ឋាភិបាល ហើយគ្រប់ប្រទេសទាំងអស់ គឺមានប្រទេសខ្លះ ត្រឹមរដ្ឋមន្ត្រី ប្រទេសខ្លះត្រឹមការងារ ប្រទេសខ្លះដល់ឧប ហើយយើងគឺឧបនាយករដ្ឋមន្ត្រី បញ្ហាអំពីការប្តេជ្ញាចិត្តរបស់យើង និងការខិតខំរបស់យើង បើយើងមិនឱ្យតម្លៃ ក្នុងការការពារផលប្រយោជន៍ ប្រជាពលរដ្ឋរបស់យើងទេ យើងមិនចាំបាច់ចរចាទេ ចឹងសូមឱ្យបងប្អូនជឿទុកចិត្តចុះ អ្វីដែលយើងបង្កើតមកនេះរាជរដ្ឋាភិបាល ដឹកនាំដោយគណបក្សប្រជាជនកម្ពុជា ខិតខំដើម្បីការពារជូន៕ រក្សាសិទ្ធដោយ៖សុទ្ធលី