កណ្តាល ៖ នៅផ្លូវជាតិលេខ ៣ ស្ថិតនៅឃុំ អន្លង់រមៀត ស្រុកកណ្ដាលស្ទឹង ខេត្តកណ្ដាល ថ្ងៃទី ២ ខែ មេសា ឆ្នាំ ២០២៥ មានមន្ត្រីនគរបាលចរាចរណ៍មួយក្រុម ដែលឈរពួនស្ទាក់នៅផ្លូវជាតិលេខ៣ បានស្ទុះចេញមកឃាត់រថយន្ត pick up ហ្វតមួយគ្រឿងដែលកំពុងបើកបរត្រឹមត្រូវតាមល្បឿនកំណត់ ម្ចាស់រថយន្តហ្វតបានជាន់ហ្រ្វាំងភ្លាមៗ ស្រាប់តែមានរថយន្ដមួយគ្រឿងទៀតបើកមកបុករថយន្តហ្វតពីក្រោយ ។
ឃើញហេតុការណ៍គ្រោះថ្នាក់ចរាចរណ៍បែបនេះ មន្ត្រីចរាចរណ៍ដែលជាអ្នកបង្ករហេតុមិនបានចុះវាស់វែងដើម្បីរកដំណោះស្រាយឲ្យប្រជាពលរដ្ឋទេ បែរជានាំគ្នាលើកកៅអី សាច់ជី ហើយបើករថយន្តគេចចេញពីគោលដៅអស់តែម្ដង ។
ទង្វើរបស់មន្ត្រីនគរបាលចរាចរណ៍ទាំងនោះ ត្រូវបានមហាជនរិះគន់យ៉ាងខ្លាំងលើបណ្ដាញសង្គមហ្វេសប៊ុក ព្រោះតែមន្រ្តីទាំងនោះមិនទទួលខុសត្រូវលើទង្វើរបស់ខ្លួន ។
ពាក់ព័ន្ធទង្វើខាងលើ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល ជម្រាបជូនសាធារណជន និងបណ្តាញសារព័ត៌មានជ្រាប ពាក់ព័ន្ធទៅនឹងគណនីហ្វេសប៊ុកឈ្មោះ Lay Kongkea ដែលបានបង្ហោះវីដេអូ សកម្មភាពមន្រ្តីនគរបាលចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ផ្លូវគោក និងបាននិយាយថា នៅពេលស្ទាក់រថយន្តគាត់មានបញ្ហាចាប់ផ្តើមរើប៉ារាស់ដោយមិនទាន់ចប់ម៉ោង។
ចំពោះករណីនេះ កើតឡើងនៅព្រឹកថ្ងៃទី០២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល។
ជាចំណាត់ការ លោកឧត្តមសេនីយ៍ទោ ស្នងការ បានបញ្ជាកម្លាំងជំនាញចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ពាក់ព័ន្ធក្នុងការអនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះ៕ រក្សាសិទ្ធដោយ៖សុទ្ធលី
