រាជធានីភ្នំពេញ ៖ លោកស្រី យី សុខវួច ចៅក្រមស៊ើប សួរសាលាដំបូងរាជធានីភ្នំពេញ កាលព្រឹកថ្ងៃទី៣០ ខែសីហា ឆ្នាំ ២០២៤ បានចេញដីកាសម្រេចឃុំខ្លួនលោកឧត្តមសេនីយ៍ឯក ស៊ុន ហួរ ទីប្រឹក្សាក្រសួងមហាផ្ទៃ ដាក់ពន្ធនាគារPJ ជាបណ្តោះអាសន្ន ក្រោមការចោទប្រកាន់ពីបទ ឆបោក និងប្រើប្រាស់ឯកសារសាធារណៈក្លែង ពាក់ពន្ធទឹកប្រាក់ប្រមាណជាង៣ លានដុល្លារអាមេរិក ។ គួររំលឹកថា ៖ សមត្ថកិច្ចឃាត់ខ្លួនលោក ស៊ុន ហួរ ទីប្រឹក្សាក្រសួងមហាផ្ទៃ ពាក់ព័ន្ធរឿងប្រាក់ជាង៣លានដុល្លារ។
សូមជម្រាបថា៖ នារសៀលថ្ងៃទី២៦ ខែសីហា ឆ្នាំ២០២៤ កម្លាំងសមត្តកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បានធ្វើការឃាត់ខ្លួនលោកឧត្តមសេនីយ៍ឯក ស៊ុន ហួរ ដែលទីប្រឹក្សាក្រសួងមហាផ្ទៃ តាមបញ្ជារពីស្ថាប័នអយ្យការអមសាលាដំបូងរាជធានីភ្នំពេញ ។
ការឃាត់ខ្លួននោះបន្ទាប់ពីសមត្ថកិច្ច បានកោះអញ្ជើញលោកឧត្តមសេនីយ៍ឯក ស៊ុន ហួរ ទៅឆ្លើយបំភ្លឺតាមពាក្យបណ្តឹងរបស់ភាគីដើមចោទ ។
សេចក្តីរាយការឲ្យដឹងទៀតថា លោកឧត្តមសេនីយ៍ឯក ស៊ុន ហួរ រងនូវបណ្តឹងចោទប្រកាន់ថា បានយកប្លង់ដីចំនួន ៧ប្លង់ ទៅដាក់យកប្រាក់ពីដើមបណ្តឹងមាន៣ ករណីសរុបទឹកប្រាក់ប្រមាណជាង៣ លានដុល្លារអាមេរិក ។
បើតាមការបង្ហើបឲ្យដឹងពីសមត្តកិច្ចថា ប្លង់ដីដែលបានដាក់តម្កល់យកប្រាក់ គឺឈ្មោះឧត្តមសេនីយ៍ឯក ស៊ុន ហួរ ប៉ុន្តែនៅពេលភាគីដើមបណ្តឹង យកទៅផ្ទៀងផ្ទាត់នៅខាងសូរិយោដី ទើបដឹងថា ប្លង់ដីនោះមិនមែនជាឈ្មោះ ស៊ុន ហួរ នោះទេ ។ ចំណុចនោះហើយដែលធ្វើឲ្យម្ចាស់ប្រាក់ កើតទុកមិនសុខចិត្ត ក៏បានប្តឹងសមត្ថកិច្ចឲ្យជួយចាត់ការតាមផ្លូវច្បាប់ ដោយជាប់ពាក់ពន្ធបទល្មើសព្រហ្មទណ្ឌ ៕ រក្សាសិទ្ធដោយ ៖ សុទ្ធលី
