ខេត្តបាត់ដំបង៖ នៅថ្ងៃទី១៥ ខែសីហា ឆ្នាំ២០១៤ វេលាម៉ោង ១៥:៤៥ នាទី មានករណីផ្ទុះមីនតោន នៅលើដីស្រែ ក្នុងភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង បណ្ដាលឱ្យបុរសម្នាក់ឈ្មោះ វ៉ាត សាវុន អាយុ ២៣ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង បានស្លាប់នៅនឹងកន្លែង ខណៈពេលដែលជនរងគ្រោះកំពុងបើកបរត្រាក់ទ័រភ្ជួរដី។
អាជ្ញាធរមីន សូមអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល។
ឯកឧត្តម ហេង រតនា អគ្គនាយកស៊ីម៉ាក់ បានថ្លែងថា “សង្គ្រាមត្រូវបានបញ្ចប់ទាំងស្រុងជាង២៥ឆ្នាំហេីយ ប៉ុន្តែឈាមខែ្មរនៅតែហូរដោយសារគ្រាប់មីននិងសំណល់យុទ្ធភណ្ឌសង្គ្រាម ហើយនៅល្ងាចថ្ងៃទី ១៥ ខែសីហា ឆ្នាំ២០២៤នេះ មានករណីផ្ទុះគ្រាប់មីនតោនសំណល់សង្គ្រាម នៅភូមិជីប៉ាង ឃុំផ្លូវមាស ស្រុករតនមណ្ឌល ខេត្តបាត់ដំបង បណ្តាលឱ្យអ្នកបើកត្រាក់ទ័រ ស្លាប់នៅនឹងកន្លែងកើតហេតុ និងខូចខាតត្រាក់ទ័រទាំងស្រុង”៕ រក្សាសិទ្ធដោយ ៖ សុទ្ធលី
