រាជធានីភ្នំពេញ ៖ កម្លាំងនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីថ្ងៃទី១៥ ខែសីហា ឆ្នាំ២០២៤ បានធ្វើការឃាត់ខ្លួនមន្ត្រីយោធាពាក់ស័ក្ត៤កន្លះម្នាក់ បញ្ជូនទៅតុលាការ ពាក់ព័ន្ធលើពាក្យបណ្តឹងពីបទករណី ឆបោក ករណីស៊ីដាច់ប្រាក់គេជិត៣ ម៉ឺនដុល្លារអាមេរិក រឿងយកលុយពីជនរងគ្រោះ២នាក់ជិត៣ម៉ឺនដុល្លារ ទៅរត់ការចូលក្របខ័ណ្ឌកងទ័ព ។
មន្ត្រីយោធានោះមានឈ្មោះ សេក សេងហុង ភេទប្រុស អាយុ៤៩ ឆ្នាំ មានទីលំនៅផ្ទះលេខ២៤C ភូមិត្រពាំងពោធិ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
សមត្តកិច្ចនគរបាលព្រហ្មទណ្ឌ បានអនុវត្តតាមដីកាបង្គាប់ឲ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ចាប់ខ្លួនមន្ត្រីយោធាម្នាក់ ពីបទ ៖ « ឆបោក »ប្រព្រឹត្តនៅផ្ទះលេខ១១៩ ផ្លូវ១១១K ភូមិក្បាលដំដី សង្កាត់កាកាបទី១ ខណ្ឌពោធិសែនជ័យ រាជធានីភ្នំពេញ កាលពីអំឡុងខែកក្កដា ឆ្នាំ ២០២១ ដែលបទល្មើសមានចែងឲ្យផ្តន្ទាទោសតាមបញ្ញតិមាត្រា ៣៧៧ និងមាត្រា៣៧៨ នៃក្រមព្រហ្មទណ្ឌ ។
ដោយយល់ឃើញថា៖ តាមដីកាបង្គាប់ឲ្យជនសង្ស័យចូលខ្លួន ចុះថ្ងៃទី០១ ខែកក្កដា ឆ្នាំ២០២៤ របស់សាលាដំបូងរាជធានីភ្នំពេញ ជនត្រូវចោទមិនព្រមចូលខ្លួនតាមដីកាកោះហៅរបស់តុលាការទេ ដូច្នោះដើម្បីធានាដល់ការស៊ើបសួរឲ្យបានពេញលេញ គប្បីសម្រេចនាំខ្លួនឈ្មោះ សេក សេងហុង មកចំពោះមុខចៅក្រមស៊ើបសួរ ដើម្បីបំភ្លឺការពិត ។
សូមបញ្ជាក់ថា ៖ មន្ត្រីយោធាពាក់ស័ក្ត៤កន្លះម្នាក់នេះ ត្រូវបានកម្លាំងសមត្តកិច្ចនគរបាលព្រហ្មទណ្ឌកម្រិតស្រាលធ្វើការឃាត់ខ្លួន កាលពីព្រឹកថ្ងៃទី១៤ ខែសីហា ឆ្នាំ២០២៤ នៅចំណុចសង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ ខណៈជនសង្ស័យកំពុងធ្វើដំណើរទៅកន្លែងធ្វើការ ។
យោងតាមពាក្យបណ្តឹងរបស់ជនរងគ្រោះបានឲ្យដឹងថា ៖ ឈ្មោះ សេក សេងហុង បានប្រើល្បិចកល់ទុច្ចរិត បញ្ចុះបញ្ចូល និងធ្វើការលួងលោម ឲ្យក្រុមគ្រួសារជនរងគ្រោះរត់ការចូលក្របខណ្ឌកងទ័ព ដោយអួតអាងថា ៖ រូបគេមានសមត្តភាពគ្រប់គ្រាន់ស្គាល់អ្នកមានអំណាច អាចរត់ការចូលក្របខណ្ឌកងទ័ពបាន ហើយជនសង្ស័យបានតម្រូវក្នុងមួយនាក់ ត្រូវចំណាយទឹកប្រាក់១៣ ០០០ ដុល្លារអាមេរិក និងអាចទទួលបានស័ក្ត២ ហើយបើសិនជាត្រូវចំណាយអស់ទឹកប្រាក់ ១៤ ០០០ ដុល្លារ វិញ នឹងអាចទទួលបានស័ក្ត៣ ដោយជនសង្ស័យបានបញ្ចុះបញ្ចូលឲ្យក្រុមគ្រួសារជនរងគ្រោះបំពេញបែបបទ ដើម្បីសុំចូលក្របខ័ណ្ឌកងទ័ព។
ដោយចាញ់បោកការលួងលោម ជនរងគ្រោះបានជឿជាក់លើឈ្មោះ សេក សេងហុង ហើយបានប្រគល់ទឹកប្រាក់សរុបចំនួន ២៧ ០០០ ដុល្លារអាមេរិក ឲ្យទៅជនសង្ស័យ ដោយជនសង្ស័យបានធានាថា នឹងយកទៅរត់ការចូលក្របខ័ណ្ឌកងទ័ព លើមនុស្ស២នាក់ ម្នាក់ពាក់ស័ក្ត២ និងម្នាក់ពាក់ស័ក្ត៣ ។
ពាក្យបណ្តឹងរបស់ជនរងគ្រោះបញ្ជាក់បន្ថែមទៀតថា ៖ បើគិតមកដល់ពេលនេះគឺមានរយៈពេល៣ ឆ្នាំហើយ ជនសង្ស័យមិនមានការឆ្លើយតបនូវអ្វីដូចដែលគេបានសន្យានោះទេ ផ្ទុយទៅវិញជនសង្ស័យតែងតែយកការដោះសារមិនឈប់នោះឡើយ ទើបជនរងគ្រោះសម្រេចដាក់ពាក្យបណ្តឹងទៅអយ្យការអមសាលាដដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕ រក្សាសិទ្ធដោយ ៖ សុទ្ធលី
