កំពង់ស្ពឺ៖ ទទួលបានព័ត៌មានពីប្រភពមហាជនល្អ ថានៅចំណុចរោងបុណ្យភូមិគីរីរស្មី ឃុំព្រៃរំដួល ស្រុកភ្នំស្រួច មានករណីចែកចាយគ្រឿងញៀន កម្លាំងការិយាល័យប្រឆាំងគ្រឿងញៀន ទទួលបញ្ជាដឹកនាំផ្ទាល់ពី លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ បានចុះសហការជាមួយអធិការដ្ឋាននគរបាលស្រុកភ្នំស្រួច បានធ្វើការបង្ក្រាបមុខសញ្ញា ១នាក់ ឈ្មោះ អុឹម ចាន់ធី (ផល) ភេទស្រី អាយុ ៤៦ឆ្នាំ នៅភូមិតាំងស្រឡៅ ឃុំតាំងស្យា ស្រុកភ្នំស្រួច និងដកហូតម្សៅក្រាមពណ៌សថ្លាសង្ស័យជាគ្រឿងញៀន២៣កញ្ចប់ (២២តូច និង ១មធ្យម), ម៉ូតូ ១គ្រឿង ទូរស័ព្ទ ៣គ្រឿង។យោងតាមចម្លើយឈ្មោះ អុឹម ចាន់ធី ឆ្លើយថាគ្រឿងញៀនជារបស់ឈ្មោះ ជឿង លីឃៀង ភេទប្រុស អាយុ ៤៣ឆ្នាំ នៅភូមិសំបួរ ឃុំតាំងស្យា ស្រុកភ្នំស្រួច ។
ដោយបានការសម្របសម្រួលនីតិវិធីពី តំណាងអយ្យការ អមសាលាដំបូងខេត្ដកំពង់ស្ពឺ សមត្ថកិច្ចប្រតិបត្តិការបន្តឃាត់ឈ្មោះ ជឿង លីឃៀង និងបន្តឆែកឆេរបន្ទប់ឈ្មោះ សាន់ រិន្ទ ភេទប្រុស អាយុ ៧១ឆ្នាំ នៅភូមិសំបួរ ឃុំតាំងស្យា ស្រុកភ្នំស្រួច ដកហូតបានគ្រឿងញៀនចំនួន ៧កញ្ចប់,ជញ្ចីងថ្លឹងគ្រឿងញៀន ១គ្រឿង,ថង់សម្រាប់វេចខ្ចប់មួយចំនួន,ម៉ូតូ១គ្រឿង,ទូរស័ព្ទដៃ ១គ្រឿង។
ជាក់ស្ដែងឃាត់មុខសញ្ញា៣នាក់ ស្រី១ ដកហូតគ្រឿងញៀន ៣០កញ្ចប់ (២៧តូច.២មធ្យម) ,ទូរស័ព្ទ ៤គ្រឿង,ម៉ូតូ ២គ្រឿង,ជញ្ចីងថ្លឹងគ្រឿងញៀន ១គ្រឿង និងថង់វេចខ្ចប់មួយចំនួន។ បច្ចុប្បន្នសមត្ថកិច្ចបានកសាងសំណុំរឿងបញ្ជូនទៅអយ្យការ អមសាលាដំបូងខេត្ដកំពង់ស្ពឺ ចំណាត់ការនីតិវិធីបន្ដ៕រក្សាសិទ្ធដោយ៖ សុទ្ធលី
