ភ្នំពេញ ៖ បុរសជាជនជាតិចិនម្នាក់ ដើរស្រែកឡូឡាពេញផ្លូវ និងសុំលុយបុគ្គលិកចាក់សាំង ស្រាប់តែមួយសន្ទុះក្រោយមក ក៏ស្រាប់តែឡើងលើបង្គោលស្លាកប៉ាណូ លោតចុះមកក្រោមសម្លាប់ខ្លួនបាត់បង់ជីវិតភ្លាមៗ នៅវេលាម៉ោង១១និង៣០នាទីព្រឹកថ្ងៃទី៨ ខែមិថុនា ឆ្នាំ២០២៤ នៅត្រង់ចំណុចស្ថានីយ៍ប្រេងឥន្ទនៈ តេលា ស្ថិតនៅតាមបណ្តោយផ្លូវជាតិលេខ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
សាកសពជាជនជាតិចិននោះ មិនស្គាល់អត្តសញ្ញាណនៅឡើយ អាយុប្រហែល៣០ឆ្នាំ ស្លៀកខោកីឡា ឆ្នូតស លាយខ្មៅ ពាក់អាវយឺតដៃខ្លី ពណ៌ប្រផេះ មិនពាក់ស្បែកជើង មានកម្ពស់ប្រហែលជា ១,៦៧ម៉ែត្រ មិនមានអ្វីបញ្ជាក់ពីអត្តសញ្ញាណជាប់ខ្លួននោះឡើយ ។
មុនពេលកើតហេតុ គេបានឃើញបុរសជនជាតិខាងលើ ដើរថ្មើរជើង ស្រែកឡូឡាពេញផ្លូវ ខណៈនោះក៏បានដើរចូលស្ថានីយ៍ប្រេងឥន្ទនៈតេលា ដោយមិននិយាយអ្វីនោះឡើយ គ្រាន់តែធ្វើកាយវិការសុំលុយ។ លុះបានបន្តិចក្រោយមក ក៏ស្រាប់តែបុរសខាងលើបានឡើងទៅលើបង្គោលស្លាកប៉ាណូ រួចហក់ចុះមកក្រោមបែកក្បាលស្លា.ប់ភ្លាមៗនៅនឹងកន្លែងកើតហេតុតែម្តង ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ រួចបន្តទាក់ទងទៅសមត្ថកិច្ចជំនាញកោសល្យវិច័យ បានយកសាកស.ពខាងលើ ទៅត្រួតពិនិត្យ នឹងតម្កល់ទុកនៅវត្តស្ទឹងមានជ័យ៕ រក្សាសិទ្ធដោយ ៖ សុទ្ធលី
