រដ្ឋធានីវ៉ាស៊ីនតោន ៖ ស្របពេលវីរុសកូវីដ-១៩ និង វីរុសបំប្លែងខ្លួនថ្មី កំពុងតែរាត្បាត នៅលើទឹកដីសហរដ្ឋអាមេរិក ផងនោះ ត្រឹមតែរយៈពេល២ថ្ងៃ រដ្ឋបាលចំណីអាហារ និង ឱសថ ហៅកាត់ FDA នៃប្រទេសមហាអំណាចកំពូលលើលោកនេះ បានអនុម័តឲ្យប្រើប្រាស់ថ្នាំលេប ចំនួន២ប្រភេទ រួមមាន ថ្នាំលេប Paxlovid របស់ក្រុមហ៊ុន Pfizer និង Molnupiravir របស់ក្រុមហ៊ុន Merck ។
គេហទំព័រ Worldometer បានចេញផ្សាយ កាលពីវេលាម៉ោង៨ព្រឹក ថ្ងៃទី២៤ ខែធ្នូ ឆ្នាំ២០២១ ថា សហរដ្ឋអាមេរិក រកឃើញករណីឆ្លងថ្មី នៃជំងឺកូវីដ-១៩ ចំនួន២៥៥ ៩០៩នាក់ និង មានករណីស្លាប់ថ្មី ១ ១១៨នាក់។ សហរដ្ឋអាមេរិក មានអ្នកឆ្លងកូវីដ-១៩ សរុប ជាង៥២,៧៧លាននាក់ ហើយក្នុងនោះមានអ្នកស្លាប់ ៨៣៤ ៤២៤នាក់ និង មានអ្នកជាសះស្បើយ ជាង៤០,៩៦លាននាក់។
គេហទំព័រ FDA បានចេញផ្សាយ កាលពីថ្ងៃទី២៣ ខែធ្នូ ឆ្នាំ២០២១ ថា ថ្ងៃនេះ រដ្ឋបាលចំណីអាហារ និងឱសថ របស់សហរដ្ឋអាមេរិក (FDA) បានចេញការអនុញ្ញាតប្រើប្រាស់ជាបន្ទាន់ (EUA) សម្រាប់ថ្នាំលេប Molnupiravir របស់ក្រុមហ៊ុន Merck សម្រាប់ការព្យាបាលជំងឺកូវីដ-១៩កម្រិតស្រាល ទៅមធ្យម ចំពោះមនុស្សពេញវ័យ ដែលមានលទ្ធផលវិជ្ជមាន ពីការធ្វើតេស្តមេរោគដោយផ្ទាល់ SARS-CoV-2 និងអ្នកដែលមានហានិភ័យខ្ពស់ ក្នុងការវិវឌ្ឍទៅជា ជំងឺកូវីដ-១៩ធ្ងន់ធ្ងរ រួមទាំងការសម្រាកព្យាបាល នៅមន្ទីរពេទ្យ ឬការស្លាប់។ សម្រាប់អ្នកដែលមានជម្រើស ពីការព្យាបាលជំងឺកូវីដ-១៩ ដែលត្រូវបានអនុញ្ញាត ដោយ FDA គឺមិនអាចប្រើបាន។ ថ្នាំ Molnupiravir គឺអាចរកបានតាមវេជ្ជបញ្ជាតែប៉ុណ្ណោះ ហើយគួរតែត្រូវបានចាប់ផ្តើមឱ្យបានឆាប់តាមដែលអាចធ្វើទៅបាន បន្ទាប់ពីការធ្វើរោគវិនិច្ឆ័យ ពីជំងឺកូវីដ-១៩ និងក្នុងរយៈពេលប្រាំថ្ងៃ បន្ទាប់ពីការចាប់ផ្តើមរោគសញ្ញា។
ការអនុម័តរបស់ FDA អនុញ្ញាតឲ្យប្រើប្រាស់ថ្នាំលេប Molnupiravir របស់ក្រុមហ៊ុន Merck កាលពីថ្ងៃទី២៣ ខែធ្នូ នេះ បានកើតឡើងមួយថ្ងៃ ក្រោយពេល FDA បានអនុម័តឲ្យប្រើប្រាស់ថ្នាំលេប Paxlovid របស់ក្រុមហ៊ុន Pfizer កាលពីថ្ងៃពុធ ទី២២ ខែធ្នូ ឆ្នាំ២០២១។
បើតាមសារព័ត៌មាន US Today បានចេញផ្សាយ កាលពីថ្ងៃទី២៣ ខែធ្នូ ថា ឱសថ Molnupiravir អាចជួយឲ្យអ្នកជំងឹកូវីដ-១៩ សម្រាកព្យាបាល នៅតាមផ្ទះបាន ហើយវានឹងអាចបញ្ឈប់នូវការវិវឌ្ឍន៍ នៃជំងឺកូវីដ-១៩ ពីរោគសញ្ញាស្រាលទៅធ្ងន់ធ្ងរ សម្រាប់មនុស្ស ដែលមានហានិភ័យខ្ពស់។ បើតាមទិន្នន័យ ដែលបានបង្ហាញដល់ក្រុមប្រឹក្សាពិគ្រោះយោបល់របស់ FDA កាលពីចុងខែវិច្ឆិកា ឆ្នាំ២០២១ បានបង្ហាញថា ថ្នាំលេប Molnupiravir នេះ អាចការពារបានចំនួន៣០ភាគរយ នៃការឆ្លងវីរុសនេះ។ ឱសថ Molnupiravir នេះ គឺមានប្រសិទ្ធភាពតិចជាងថ្នាំលេប Paxlovid របស់ក្រុមហ៊ុន Pfizer ដែល FDA បានអនុញ្ញាត កាលពីថ្ងៃពុធ ទី២២ ខែធ្នូ ឆ្នាំ២០២១។
ថ្នាំលេប Molnupiravir បានបង្កើតឡើង រួមគ្នា រវាងក្រុមហ៊ុន Merck និង ក្រុមហ៊ុន Ridgeback Biotherapeutics ។ អ្នកជំងឺកូវីដ-១៩ អាចលេបថ្នាំនេះ ក្នុងរយៈពេល៥ថ្ងៃ ដោយលេបម្ដងចំនួន៤គ្រាប់ ក្នុងចន្លោះពេល១២ម៉ោង។ ចំណែករដ្ឋាភិបាលសហរដ្ឋអាមេរិក បានបញ្ជាទិញមុនដំបូងនូវថ្នាំលេប Molnupiravir ចំនួន ៣,១លាន Course (1 Course មាន៤០គ្រាប់ អាចព្យាបាលសម្រាប់មនុស្សម្នាក់) ក្នុងតម្លៃប្រហែល ២,២ពាន់លានដុល្លារអាមេរិក។
ក្រុមហ៊ុន Merck បានបញ្ជាក់ថា ក្រុមហ៊ុនបានត្រៀមរួចជាស្រេច ក្នុងការដឹកជញ្ជូនឱសថរាប់ម៉ឺនប្រអប់ ក្នុងរយៈពេលប៉ុន្មានថ្ងៃ ក្រោយមានការអនុញ្ញាតពី FDA ។ រីឯឱសថចំនួន១លានប្រអប់ នឹងត្រូវដឹកជញ្ជូនទៅចែកចាយ ក្នុងរយៈពេលប៉ុន្មានសប្តាហ៍ខាងមុខ នៅទូទាំងសហរដ្ឋអាមេរិក។ ចំណែកថ្នាំចំនួន១០លានប្រអប់ទៀត នឹងត្រូវបានត្រៀមរួចរាល់ ក្នុងការវេចខ្ចប់ និង ចែកចាយ នៅទូទាំងពិភពលោក។ ដោយឡែក ថ្នាំលេប Paxlovid របស់ក្រុមហ៊ុន Pfizerr ក៏ត្រូវបានគេរំពឹងថា មុនដំបូងនេះ នឹងមានការខ្វះខាត ព្រោះវាពិបាក ក្នុងផលិត និងចំណាយពេលច្រើន៕ រក្សាសិទ្ធិដោយ ៖ សារាយ SN
