រដ្ឋធានីព្យុងយ៉ាង៖ ក្រោយពេលទទួលរងគ្រោះផ្ទួនៗពីខ្យល់ព្យុះទីហ្វុងដ៏អាក្រក់ កាលពីឆ្លងកន្លងទៅ ហើយនៅឆ្នាំនេះ ប្រឈមនឹងគ្រោះរាំងស្ងួត និងទឹកជំនន់ដ៏ខ្លាំងក្លា បំផ្លិចបំផ្លាញយ៉ាងខ្លាំងដល់វិស័យកសិកម្មរបស់ប្រទេសកូរ៉េខាងជើង ជាបន្ដបន្ទាប់រហូតមក លោក គីម ចុងអ៊ុន បានអំពាវនាវដល់មន្ដ្រីរបស់ខ្លួន ត្រូវតែដោះស្រាយបញ្ហាផ្គត់ផ្គង់ស្បៀងអាហារ និង គ្រោះមហន្ដរាយ ពីការប្រែប្រួលអាកាសធាតុ។
សារព័ត៌មាន BBC បានផ្សាយ កាលពីថ្ងៃទី៣ ខែកញ្ញា ឆ្នាំ២០២១ ថា លោក គីម ជុងអ៊ុន មេដឹកនាំកូរ៉េខាងជើង បានអំពាវនាវដល់មន្ដ្រីរបស់ខ្លួន ត្រូវតែដោះស្រាយជាបន្ទាន់នូវបញ្ហាផ្គត់ផ្គង់ស្បៀងអាហារជូនដល់ប្រជាជន និង គ្រោះមហន្ដរាយ ពីការប្រែប្រួលអាកាសធាតុ។
លោក គីម ជុងអ៊ុន មេដឹកនាំកូរ៉េខាងជើង បានបញ្ជាក់ថា វិធានការនានា ដើម្បីយកជ័យជម្នះលើការប្រែប្រួលអាកាសធាតុ ជាតម្រូវការចាំបាច់។ ជាមួយគ្នានេះ លោក គីម បានស្នើដល់មន្ដ្រីកូរ៉េខាងជើងទាំងអស់ ត្រូវតែតាមដាន អំពីគ្រោះរាំងស្ងួន និង គ្រោះទឹកជំនន់។ លោក គីម បានថ្លែងសុន្ទរកថាបែបនេះ នៅក្នុងកិច្ចប្រជុំការិយាល័យនយោបាយរបស់គណបក្សដឹកនាំប្រទេសកូរ៉េខាងជើង កាលពីថ្ងៃទី២ ខែកញ្ញា ឆ្នាំ២០២១។
ព្យុះទីហ្វុង កាលពីឆ្នាំកន្លងទៅ បានវាយប្រហារយ៉ាងខ្លាំង ដល់ប្រទេសកូរ៉េខាងជើង បណ្ដាលឲ្យខូចខាតដល់វិស័យកសិកម្មយ៉ាងដំណំ នៅក្នុងប្រទេសកុម្មុយនីស្ដមួយនេះ។ ក្រោយពេលគ្រោះធម្មជាតិមួយនេះកន្លងផុតទៅ កូរ៉េខាងជើង ក៏ជួបនឹងគ្រោះរាំងស្ងួត ហើយបន្ដមកទៀត ក៏មានព្យុះភ្លៀងយ៉ាងខ្លាំង បំផ្លិចបំផ្លាញផលដំណាំយ៉ាងដំណំបន្ដទៀត នៅឆ្នាំនេះ។
បច្ចុប្បន្ន កូរ៉េខាងជើង កំពុងតែប្រឈមមុខនឹងបញ្ហាសេដ្ឋកិច្ចយ៉ាងធ្ងន់ ក្រោយប្រទេសនេះបានរងនូវការដាក់ទណ្ឌកម្មសេដ្ឋកិច្ច ពីអន្ដរជាតិ ជុំវិញកម្មវិធីអាវុធនុយក្លេអ៊ែររបស់ខ្លួន, ការបិទព្រំដែនជាមួយនឹងចិន ទប់ស្កាត់ជំងឺកូវីដ-១៩ និង គ្រោះធម្មជាតិ (ព្យុះទីហ្វុង គ្រោះរាំងស្ងួត និងទឹកជំនន់)។ ទោះជាយ៉ាងណា រហូតមកដល់ពេលនេះ កូរ៉េខាងជើង នៅមិនទាន់ មានសេចក្ដីរាយការណ៍ ពីករណីកូវីដ-១៩ណាមួយនៅឡើយដែរ។
អង្គការសហប្រជាជាតិ កាលពីដើមសប្ដាហ៍នេះ បានថ្លែងថា កូរ៉េខាងជើង បានច្រានចោលនូវការផ្ដល់វ៉ាក់សាំងបង្ការកូវីដ-១៩ ចំនួន៣លានដូស។ ប៉ុន្ដែកូរ៉េខាងជើង បានស្នើសុំឲ្យផ្ដល់វ៉ាក់សាំងទាំងនោះ ទៅដល់បណ្ដាប្រទេសផ្សេងៗ ដែលកំពុងរងផលប៉ះពាល់ ចំពេលពិភពលោកកំពុងខ្វះខាតវ៉ាក់សាំង៕ រក្សាសិទ្ធិដោយ ៖ សារាយ SN
