រដ្ឋធានីកាប៊ូល៖ តាលីបង់បានកេណ្ឌកម្លាំងប្រយុទ្ធរបស់ខ្លួន ជិត១០ ០០០នាក់ វាយសន្ធាប់យ៉ាងខ្លាំង ប៉ុនប៉ងរឹបអូសខេត្តផេនសៀរ ដែលជាខេត្តចុងក្រោយតែមួយគត់ មិនស្ថិតក្រោមតាលីបង់គ្រប់គ្រង ប៉ុន្ដែក្រុមចលនាតស៊ូអាហ្វហ្គានីស្ថាន ឈ្មោះ «រណសិរ្សតស៊ូជាតិ ហៅកាត់ NRF » បានវាយបកតបតមកវិញយ៉ាងខ្លាំង បណ្ដាលឲ្យតាលីបង់បាត់បង់ជីវិត ៤៥០នាក់ និង ១៣០នាក់ផ្សេងទៀត ត្រូវចាប់ខ្លួន កាលពីថ្ងៃទី៣ ខែកញ្ញា ឆ្នាំ២០២១។
សារព័ត៌មានររុស្ស៊ី Sputnik បានចេញផ្សាយ កាលពីថ្ងៃទី៣ ខែកញ្ញា ថា ផេនសៀរ (Panjsir) ជាខេត្តមួយ មានចម្ងាយប្រហែល១២៥គីឡូម៉ែត្រ នាភាគឦសាន ពីរដ្ឋធានីកាប៊ូល ដែលមិនស្ថិតក្រោមការគ្រប់គ្រងរបស់តាលីបង់ និងជាទីតាំងដ៏រឹងមាំរបស់ចលនាតស៊ូជាតិអាហ្វហ្គានីស្ថាន (NRF)។ បច្ចុប្បន្ន ខេត្តមួយចុងក្រោយមួយនេះ កំពុងតែក្លាយជាសមរភូមិក្ដៅ នៃការវាយប្រយុទ្ធគ្នា រវាងកងកម្លាំងតាលីបង់ និងចលនាតស៊ូ NRF។
លោក Fahim Dashti អ្នកនាំពាក្យចលនាតស៊ូអាហ្វហ្គានីស្ថាន ហៅកាត់ NRF បានថ្លែង កាលពីថ្ងៃទី៣ ខែកញ្ញាថា ការវាយប្រយុទ្ធគ្នាពេញមួយយប់កន្លងមកនេះ តាលីបង់បានបញ្ជូនកងកម្លាំង ចំនួន ៨ ០០០នាក់ មកវាយសន្ធាប់ ចូលកាន់កាប់តំបន់ជ្រលងភ្នំផេនសៀរ។ ប៉ុន្ដែចលនាតស៊ូរបស់ NRF បានវាយបក និង ពួនស្ទាក់វាយប្រហារតបតវិញ មិនឲ្យតាលីបង់រុលចូលមកមុខបាន។ ជាលទ្ធផល នៃការវាយប្រយុទ្ធគ្នា រយៈពេល៤ម៉ោងនេះ ចលនាតស៊ូ NRF បានធ្វើឲ្យតាលីបង់ បាត់បង់យ៉ាងដំណំ ហើយកងកម្លាំងតាលីបង់ ចំនួន៤៥០នាក់ ត្រូវបានកម្ទេច និង១៣០នាក់ផ្សេងទៀត ត្រូវចាប់ខ្លួន។
លោក Fahim Dashti អ្នកនាំពាក្យចលនាតស៊ូ NRF បានបញ្ជាក់ថា កងកម្លាំងរបស់ចលនាតស៊ូ កំពុងតែវាយរុលចូលទៅជិតខេត្តបាដាក់សាន់ (Badakhshan), ខេត្តកាពីសា(Kapisa) និង ខេត្តបាក់លេន (Baghlan) ។
ដោយឡែក អ្នកនាំពាក្យតាលីបង់ បានសរសេរ នៅលើបណ្ដាញសង្គមធ្វីធើរថា កងកម្លាំងរបស់ខ្លួន បានចូលគ្រប់គ្រង Panjsir ហើយលោក Amrullah Saleh ដែលតែងតាំងខ្លួនឯងជាប្រធានាធិបតីស្ដីទីអាហ្វហ្គានីស្ថាន និងលោក Ahmad Massoud ជាមេដឹកនាំចលនា NRF n: បានរត់ភៀសខ្លួន ចេញពីជ្រលងភ្នំផេនសៀរ ហើយ។
ផ្ទុយពីការលើកឡើងរបស់អ្នកនាំពាក្យតាលីបង់នោះ លោក Amrullah Saleh បានបញ្ចេញវីដេអូមួយ ដោយបង្ហាញថា «ខ្ញុំកំពុងតែស្ថិតក្នុងតំបន់ជ្រលងភ្នំផេនសៀរ។ បច្ចុប្បន្ន ការតស៊ូកំពុងតែបន្ដ ហើយនឹងបន្ដទៅមុខទៀត។ ខ្ញុំនៅទីនេះ ជាទឹកដីរបស់ខ្ញុំ ដើម្បីការពារទឹកដីរបស់ខ្ញុំ»។
លោក Amrullah Saleh បានបញ្ជាក់ នៅលើបណ្ដាញសង្គមធ្វីធើរ ថា «ថ្ងៃនេះ ជាថ្ងៃសុក្រ ទី៣ ខែកញ្ញា ឆ្នាំ២០២១ វេលាម៉ោង៩ និង១៥នាទី វេលាក្នុងតំបន់ ខ្ញុំស្ថិតនៅជ្រលងភ្នំផេនសៀរ។ ចំណែកសេចក្ដីរាយការណ៍ ដែលអះអាងថា ខ្ញុំបាន រត់ចេញពីប្រទេសអាហ្វហ្គានីស្ថានោះ គឺមិនផ្អែកលើមូលដ្ឋានពិតប្រាកដឡើយ។ ខ្ញុំនៅទីនេះ គឺមានកិច្ចប្រជុំជាច្រើន ពាក់ព័ន្ធនឹងស្ថានភាព នៅជ្រលងភ្នំនេះ។ បច្ចុប្បន្ន យើងកំពុងតែប្រឈមមុខនឹងការឈ្លានពាន ពីតាលីបង់ ហើយក្រុមភេរវករដទៃទៀត»។
ក្នុងរយៈពេលប៉ុន្មានសប្ដាហ៍កន្លងទៅថ្មីៗនេះ ផេនសៀរ ក្លាយជាខេត្តតែមួយគត់ ក្នុងចំណោមខេត្តទាំង៣៤របស់អាហ្វហ្គានីស្ថាន មិនស្ថិតក្រោមការគ្រប់គ្រងរបស់តាលីបង់។ ភូមិសាស្ដ្រធម្មជាតិនៅទីនោះ មានអំណោចផលល្អ ដែលជាជញ្ជាំងដល់រឹងមាំ សម្រាប់ចលនាតស៊ូ។ តាលីបង់ បានដាក់កងកម្លាំងរបស់ខ្លួន ឡោមព័ទ្ធខេត្តមួយនេះ និងតំបន់ដទៃទៀត កាលពីដើមសប្ដាហ៍នេះ ហើយចាប់ផ្ដើមបើកការវាយប្រហារទ្រង់ទ្រាយធំ កាលពីថ្ងៃទី២ ខែកញ្ញា ឆ្នាំ២០២១ ក្រោយការចរចាជាមួយនឹងលោក Ahmad Massoud មេដឹកនាំចលនាតស៊ូ NRF ទទួលបរាជ័យ។
សូមជម្រាបថា រណសិរ្សតស៊ូជាតិ (NRF ដឹកនាំដោយលោក Ahmad Massoud ជាកូនប្រុសរបស់មេបញ្ជាការជនជាតិអាហ្វហ្គានីស្ថាន លោក Ahmad Shah Massoud ដែលបានជួយបណ្ដេញកងកម្លាំងសហភាពសូវៀត ឲ្យចាកចេញពីទឹកដីអាហ្វហ្គានីស្ថាន នៅក្នុងអំឡុងឆ្នាំ១៩៨៩ ហើយនាំឲ្យមានចលនាតស៊ូប្រឆាំងនឹងតាលីបង់ ដែលកាលពីមុន បានគ្រប់គ្រងទឹកដីអាហ្វហ្គានីស្ថាន ចន្លោះពីឆ្នាំ១៩៩៦-២០០១ មុនពេលសហរដ្ឋអាមេរិក បានបណ្ដេញចេញពីអំណាច។ ជ្រលងភ្នំនេះ ជាមូលដ្ឋានដ៏រឹងមាំរបស់ចលនាតស៊ូ តាំងពីសម័យសហភាពចូលមកលុកលុយ នៅក្នុងប្រទេសអាហ្វហ្គានីស្ថាន ហើយកងកម្លាំងបរទេស មិនអាចគ្រប់គ្រងតំបន់នេះបានឡើយ ព្រោះវាជាទីតាំងដ៏ល្អ សម្រាប់ចលនាតស៊ូ៕ រក្សាសិទ្ធិដោយ ៖ សារាយ SN
