មន្ទីរបញ្ចាកោណ និងសមាជិកសភា មកពីគណបក្សសាធារណរដ្ឋកាលពីថ្ងៃអង្គារទី ២៧ ខែកក្កដាកន្លងទៅ បានបង្ហាញការព្រួយបារម្ភថ្មីមួយ ចំពោះការកសាងកម្លាំងនុយក្លេអ៊ែររបស់ចិន បន្ទាប់ពីមានរបាយការណ៍ថ្មីមួយ បាននិយាយថា ទីក្រុងប៉េកាំងកំពុងសាងសង់មីស៊ីល ចំនួន ១១០ បន្ថែមទៀត។
របាយការណ៍របស់សហព័ន្ធអ្នកវិទ្យាសាស្ត្រអាមេរិក (AFS) កាលពីថ្ងៃចន្ទកន្លងទៅបាននិយាយថា រូបភាពផ្កាយរណបបានបង្ហាញថា ប្រទេសចិនកំពុងសាងសង់វាលថ្មីមួយ នៅជិតតំបន់ហាមីនៅភាគខាងកើត នៃតំបន់ស៊ីនជាំងរបស់ខ្លួន។
របាយការណ៍នេះ បានកើតឡើងមួយសប្តាហ៍ បន្ទាប់ពីការស្ថាបនាមីស៊ីលប្រមាណ ១២០ គ្រាប់នៅយូមែន ( Yumen ) ដែលជាតំបន់វាលខ្សាច់ប្រហែល ៣៨០ គីឡូម៉ែត្រទៅភាគអាគ្នេយ៍។
បញ្ជាការយុទ្ធសាស្ត្រអាមេរិក បាននិយាយនៅក្នុងបណ្តាញសង្គមTweetថា៖« នេះជាលើកទី ២ ក្នុងរយៈ ពេល ២ ខែដែលសាធារណជនបានរកឃើញនូវអ្វី ដែលយើងបាននិយាយ អំពីការគំរាមកំហែង ដែលពិភពលោកកំពុងកើនឡើង និងការលាក់កំបាំងដែលនៅព័ទ្ធជុំវិញបញ្ហានេះ»។
ក្រសួងការបរទេសសហរដ្ឋអាមេរិក កាលពីដើមខែកក្កដា បានហៅការពង្រឹងនុយក្លេអ៊ែរ របស់ចិនគឺជាក្តីព្រួយបារម្ភ ហើយខ្លួនបាននិយាយថា វាហាក់ដូចជាទីក្រុងប៉េកាំង កំពុងងាកចេញពីយុទ្ធសាស្ត្រនុយក្លេអ៊ែរ រាប់ទសវត្សរ៍ ដោយផ្អែកលើការទប់ស្កាត់តិចតួចបំផុត។ សហរដ្ឋអាមេរិកក៏បានអំពាវនាវ ឱ្យប្រទេសចិនចូលរួមជាមួយខ្លួន៖« លើវិធានការណ៍ជាក់ស្តែង ដើម្បីកាត់បន្ថយហានិភ័យ នៃអស្ថិរភាពនៃការប្រណាំងសព្វាវុធ» ។
របាយការណ៍ចេញពីមន្ទីរបញ្ចាកោណឆ្នាំ ២០២០ បានប៉ាន់ប្រមាណថា ឃ្លាំងស្តុកក្បាលគ្រាប់នុយក្លេអ៊ែររបស់ចិននៅក្នុង«ឆ្នាំ ២០០គឺទាប»ហើយបាននិយាយថា គ្រាប់មីស៊ីលត្រូវបានគេព្យាករណ៍ថា នឹងមានទំហំយ៉ាងហោចណាស់ ទ្វេដងនៅពេលដែលទីក្រុងប៉េកាំងពង្រីក និងធ្វើទំនើបកម្មកម្លាំងរបស់ខ្លួន។
ក្រុមអ្នកវិភាគនិយាយថា សហរដ្ឋអាមេរិក មានក្បាលគ្រាប់ប្រមាណ ៣.៨០០ គ្រាប់។ ហើយបើយោងទៅតាមអង្គហេតុនៃក្រសួងការបរទេស ចំនួន ១,៣៥៧ នៃគ្រាប់ ទាំងនោះត្រូវបានដាក់ពង្រាយ នៅថ្ងៃទី ១ ខែមីនា។
ទីក្រុងវ៉ាស៊ីនតោន បានអំពាវនាវម្តងហើយម្តងទៀត ឱ្យប្រទេសចិនចូលរួមជាមួយខ្លួន និងប្រទេសរុស្ស៊ី នៅក្នុងសន្ធិសញ្ញាត្រួតពិនិត្យអាវុធថ្មីមួយ។
ទីក្រុងប៉េកាំងនិយាយថា ឃ្លាំងអាវុធរបស់ខ្លួន គឺតូចជាង សហរដ្ឋអាមេរិក និងរុស្ស៊ី ហើយខ្លួនបានត្រៀម ធ្វើការសន្ទនាទ្វេភាគីស្តីពីសន្តិសុខជាយុទ្ធសាស្ត្រ“ ដោយឈរលើសមភាព និងការគោរពគ្នាទៅវិញទៅមក”៕ ប្រភព៖ CNA
រក្សាសិទ្ធិដោយ៖CEN