ចូលរួមសោកស្តាយផង ! ធ្លាក់យន្តហោះនៅរុស្ស៊ី មនុស្ស ២៨ នាក់ គ្មានសង្ឃឹមនៅមានជីវិត ដែលក្នុងចំណោមនោះមាន….

យន្ដហោះ Antonov An-26 ដឹកមនុស្ស ២៨ នាក់ បានធ្លាក់នៅថ្ងៃអង្គារ (៦ កក្កដា ២០២១) ម្សិលមិញនេះ ខណៈវាបានចូលមក ដើម្បីត្រៀមធ្វើការចុះចតនៅក្នុងអាកាសធាតុអាក្រក់ នៅអាកាសយានដ្ឋាននៅភាគខាងត្បូងនៃប្រទេសរុស្ស៊ី ហើយមនុស្សគ្រប់គ្នានៅលើយន្តហោះ ត្រូវបានគេជឿថាគ្មានសង្ឃឹមអាចនៅមានជីវិតនោះទេ។

បំណែកយន្តហោះ An-26 ត្រូវបានរកឃើញនៅលើច្រាំងថ្មឆ្នេរសមុទ្រ និងនៅក្បែរសមុទ្រ ជិតព្រលានយន្តហោះក្នុងទីប្រជុំជន Palana ។ មន្រ្តីមកពីតំបន់ Kamchatka បាននិយាយថា យន្ដហោះនេះកំពុងឆ្ពោះទៅកាន់ការចុះចតនៅក្នុងអាកាសធាតុអ័ព្ទ និងពពក នៅពេលដែលវាខកខានទំនាក់ទំនងដែលបានគ្រោងទុក ហើយបានបាត់ពីអាក្រង់រ៉ាដា។

យោងតាមសម្តីរបស់លោក Sergei Gorb អនុប្រធានក្រុមហ៊ុនដែលជាម្ចាស់យន្តហោះ Kam Kamka Aviation Enterprise បានឱ្យដឹងថា យន្ដហោះនេះបានធ្លាក់ចូលទៅក្នុងជ្រោះសមុទ្រ ដែលមិនត្រូវបានគេរំពឹងថា នឹងស្ថិតនៅក្នុងទិសដៅចុះចតរបស់វាទេ។

ទីភ្នាក់ងារសារព័ត៌មានរដ្ឋ Tass បានរាយការណ៍ថា យន្ដហោះនេះបានដំណើរការតាំងពីឆ្នាំ១៩៨២ ។ លោក Alexei Khabarov នាយកសហគ្រាសអាកាសចរណ៍ Kamchatka បានប្រាប់ទីភ្នាក់ងារសារព័ត៌មាន Interfax ថា យន្ដហោះនេះមានសម្លេងបច្ចេកទេស មុនពេលហោះចេញពីទីក្រុង Petropavlovsk-Kamchatsky ។

យោងតាមរបាយការណ៍របស់ប្រព័ន្ធផ្សព្វផ្សាយរុស្ស៊ី គឺមិនមានសមាជិកអាកាសយានិក ៦ នាក់ ឬអ្នកដំណើរ ២២ នាក់ នៅលើយន្តហោះគ្រោះថ្នាក់នេះ នៅរស់រានមានជីវិតឡើយ។ អ្នកនាំពាក្យរដ្ឋាភិបាលក្នុងស្រុក Kamchatka បាននិយាយថា ប្រមុខរដ្ឋាភិបាលមូលដ្ឋាននៅ Palana គឺលោកស្រី Olga Mokhireva ក៏ស្ថិតក្នុងចំណោមអ្នកដំណើរទាំងនោះផងដែរ។

តែទោះយ៉ាងណា គេមិនទាន់រកឃើញសាកសពនៅឡើយទេ ហើយក៏មិនទាន់មានការបញ្ជាក់ជាផ្លូវការណាមួយនៃរបាយការណ៍នេះដែរ។

ទីភ្នាក់ងារអាកាសចរណ៍របស់រដ្ឋរុស្ស៊ី Rosaviatsiya បាននិយាយថា ផ្នែកខ្លះនៃយន្ដហោះត្រូវបានគេរកឃើញចម្ងាយប្រហែល ៣ គីឡូម៉ែត្រ ពីផ្លូវរត់របស់អាកាសយានដ្ឋាន។ ផ្នែកខ្លះនៃតួយន្តហោះត្រូវបានគេរកឃើញនៅផ្នែកម្ខាងនៃជើងភ្នំ។

អភិបាលខេត្ត Kamchatka លោក Vladimir Solodov បាននិយាយថា បេសកកម្មស្វែងរក និងជួយសង្គ្រោះ បានចាប់ផ្តើមនៅក្នុងតំបន់ភ្នំ ប៉ុន្តែការងារត្រូវបានផ្អាក បន្ទាប់ពីពេលយប់បានចូលមកដល់។

លោក Solodov បាននិយាយនៅក្នុងវីដេអូដែលត្រូវបានបង្ហោះនៅលើគេហទំព័ររបស់រដ្ឋាភិបាលក្នុងតំបន់ថា “តំបន់នោះគឺពិតជាពិបាកខ្លាំងក្នុងការចូលដំណើរការរុករក ហើយឧទ្ធម្ភាគចក្រ ក៏មិនអាចចុះចតនៅទីនោះបានទេ”។ ហេតុនេះ នឹងត្រូវបន្តនៅព្រឹកថ្ងៃស្អែក។

អាជ្ញាធរមានគម្រោងពង្រាយអ្នកមុជទឹកជំនាញ និងអ្នកជួយសង្គ្រោះដែលទទួលការបណ្តុះបណ្តាល សម្រាប់ធ្វើការនៅលើភ្នំ។

លោក Solodov បានបន្ថែមទៀតថា ក្រុមមន្រ្តីរដ្ឋាភិបាលមួយក្រុម រួមទាំងរដ្ឋមន្រ្តីដឹកជញ្ជូន Vitaly Savelyev នឹងធ្វើដំណើរទៅកាន់ Palana នៅថ្ងៃពុធនេះផងដែរ៕ រក្សាសិទ្ធិដោយ៖ លឹម ហុង