មន្ត្រីបាននិយាយថា យ៉ាងហោចណាស់មនុស្ស ១៧ នាក់បានស្លាប់និង ៤០ នាក់រងរបួសកាលពីថ្ងៃអាទិត្យ នៅពេលយន្តហោះយោធាហ្វីលីពីនមួយគ្រឿង ដែលដឹកកងទ័ពបានធ្លាក់ និងឆាបឆេះយ៉ាងសន្ធោសន្ធៅ បន្ទាប់ពីបាត់ផ្លូវរត់នៅភាគខាងត្បូងប្រទេស។
មនុស្ស ៩២ នាក់ដែលភាគច្រើនជានិស្សិតបញ្ចប់ការសិក្សា ពីកងទ័ពបានធ្វើដំណើរតាមយន្តហោះដឹកជញ្ជូន C-130 Hercules នៅពេលគ្រោះថ្នាក់បានកើតឡើង ខណៈវាព្យាយាមចុះចតលើកោះជូឡូ ក្នុងខេត្តស៊ូលូនាពេលថ្ងៃត្រង់។ រដ្ឋមន្រ្តីការពារជាតិលោក Delfin Lorenzana បាននិយាយនៅក្នុងសេចក្តីថ្លែងការណ៍មួយថា៖« រហូតមកដល់ពេលនេះអ្នករបួស ៤០ នាក់ ត្រូវបានជួយសង្គ្រោះហើយសាកសព ១៧ នាក់ត្រូវបានរកឃើញ” ។
រូបថតដែលថតដោយប្រព័ន្ធផ្សព្វផ្សាយក្នុងស្រុក Pondohan TV និងបានបង្ហោះនៅលើទំព័រហ្វេសប៊ុករបស់ខ្លួន បានបង្ហាញពីបំណែកនៃយន្តហោះ ដែលបានឆាបឆេះដោយអណ្តាតភ្លើង។ ផ្សែងខ្មៅក្រាស់មួយដុំបានហោះឡើង ហួសដំបូលផ្ទះ ដែលមានទីតាំងនៅជិតកន្លែងធ្លាក់យន្តហោះ។
អគ្គមេបញ្ជាការកងកម្លាំងប្រដាប់អាវុធទូទៅលោក Cirilito Sobejana បាននិយាយថា យន្ដហោះនេះបានដឹកកងទ័ពចេញពីតំបន់ Cagayan de Oro នៅលើកោះ Mindanao ភាគខាងត្បូងនៅពេលដែលវាបាន«បាត់ផ្លូវរត់» នៅពេលយន្តហោះព្យាយាមចុះចតនៅកោះ ជូឡូ ។
លោកបានប្រាប់បណ្តាញព័ត៌មានក្នុងស្រុកថា៖« យន្ដហោះបានព្យាយាមធ្វើឱ្យមានថាមពលកម្លាំងម៉ាស៊ីនឡើងវិញដែរ ប៉ុន្តែធ្វើវាមិនបាន»។ លោក Sobejana បានប្រាប់ AFP ថា៖ «ក្រុមអ្នកឆ្លើយតបនៅកន្លែងនោះឥឡូវយើងកំពុងអធិដ្ឋាន ថាយើងអាចសង្គ្រោះជីវិតមនុស្សបានច្រើន»។
លោក Sobejana បាននិយាយថាមនុស្ស ៤០ នាក់ដែលត្រូវបានជួយសង្គ្រោះ ពីបំណែកយន្តហោះកំពុងត្រូវបានព្យាបាលនៅមន្ទីរពេទ្យទី ១១ នៃកងពលធំថ្មើរជើង។ អ្នកនាំពាក្យកងទ័ពអាកាស លោកវរសេនីយ៍ទោ Maynard Mariano បាននិយាយថា មូលហេតុនៃការធ្លាក់នេះ នឹងត្រូវបានស៊ើបអង្កេត។
អ្នកនាំពាក្យឧត្តមសេនីយ៍ឯក Edgard Arevalo បានប្រាប់វិទ្យុ DZBB ថា វាត្រូវបានគេចាត់ទុកជាគ្រោះថ្នាក់ ជាជាងការវាយប្រហារ។ ឧត្ដមសេនីយ៍ឯកទី ១ Jerrica Angela Manongdo បានប្រាប់ AFP ថា យន្ដហោះដែលមានម៉ាស៊ីន ៤ គ្រឿងនេះបានធ្លាក់នៅក្បែរកន្លែងយកថ្មមួយកន្លែង ដែលមានប្រជាជនរស់នៅច្រើន។
ភាគច្រើននៃអ្នកដំណើរថ្មីៗនេះបានបញ្ចប់ការបណ្តុះបណ្តាលយោធាមូលដ្ឋាន ហើយត្រូវបានបញ្ជូនទៅកោះ ដែលនៅសល់ជាផ្នែកមួយ នៃក្រុមការងាររួមប្រយុទ្ធប្រឆាំង នឹងអំពើភេរវកម្មនៅក្នុងតំបន់ ដែលមានជនជាតិភាគតិចមូស្លីម៕
ប្រភពៈ Al Jazeera
រក្សាសិទ្ធិដោយ៖CEN