វៀតណាមកាលពីថ្ងៃទី២៣ មិថុនា បានបោះឆ្នោតគាំទ្រសេចក្តីសម្រេចចិត្ត របស់អង្គការសហប្រជាជាតិ ដោយអំពាវនាវឱ្យបញ្ឈប់ការដាក់ទណ្ឌកម្មសេដ្ឋកិច្ចពាណិជ្ជកម្ម និង ហិរញ្ញវត្ថុជាច្រើនទសវត្សរ៍ ដែលបានដាក់ដោយសហរដ្ឋអាមេរិក ប្រឆាំងនឹងប្រទេសគុយបា ហើយបានជំរុញឱ្យសហរដ្ឋអាមេរិក បញ្ច្រាសគោលនយោបាយគុយបាបច្ចុប្បន្នដើម្បីផលប្រយោជន៍ ទាំងប្រជាជន និងដើម្បីសន្តិភាពស្ថិរភាព និងការអភិវឌ្ឍនៅក្នុងតំបន់ និងពិភពលោក។
សេចក្តីសម្រេចនេះត្រូវបានអនុម័តដោយមហាសន្និបាតអង្គការសហប្រជាជាតិ ក្នុងកិច្ចប្រជុំនៅថ្ងៃដដែលដោយមានសំឡេងគាំទ្រ ១៨៤ សំឡេងមិនគាំទ្រ ២ និងអនុបវាទ ៣(មិនមានវត្តមាន) ។ អ្នកចូលរួមបានបង្ហាញពីការព្រួយបារម្ភអំពីផលប៉ះពាល់អវិជ្ជមានដែលបណ្តាលមកពីវិធានការឯកតោភាគីរបស់ សហរដ្ឋអាមេរិកក៏ដូចជាការលំបាក និងបញ្ហាប្រឈមចំពោះការអភិវឌ្ឍ របស់ប្រទេសការ៉ាបៀនលើគ្រប់វិស័យ។
ពួកគេបានគូសបញ្ជាក់ពីភាពចាំបាច់សម្រាប់សហរដ្ឋអាមេរិក ក្នុងការដកទណ្ឌកម្ម និងប្តេជ្ញាគោរពតាមគោលការណ៍ គោលបំណង និងស្មារតីនៃធម្មនុញ្ញរបស់អង្គការសហប្រជាជាតិ ជាពិសេសចំពោះសិទ្ធិស្មើភាព អធិបតេយ្យភាព និងការមិនជ្រៀតជ្រែកចូលកិច្ចការផ្ទៃក្នុងរបស់រដ្ឋដទៃទៀត។
ថ្លែងទៅកាន់អង្គប្រជុំ ឯកអគ្គរដ្ឋទូតវៀតណាមលោក Dang Dinh Quy តំណាងអចិន្ត្រៃយ៍វៀតណាមប្រចាំនៅ អង្គការសហប្រជាជាតិ បានគូសបញ្ជាក់ថា ការបិទផ្លូវសេដ្ឋកិច្ចពាណិជ្ជកម្ម និងហិរញ្ញវត្ថុប្រឆាំងនឹងប្រទេសគុយបាដែលបានកំណត់ក្នុងឆ្នាំ ១៩៦២ គឺប្រឆាំងនឹងច្បាប់អន្តរជាតិ និងគោលការណ៍គ្រឹះនៃធម្មនុញ្ញអង្គការសហប្រជាជាតិ។
លោកបានកត់សម្គាល់ថា៖ « នេះគឺជាប្រព័ន្ធទណ្ឌកម្មឯកតោភាគី និងអយុត្តិធម៌ ហើយវែងបំផុតដែលបានដាក់ប្រឆាំង នឹងប្រទេសមួយក្នុងប្រវត្តិសាស្ត្រពិភពលោកទំនើប។ លោកបានបន្ថែមទៀតថា៖ ការដាក់ទណ្ឌកម្មនេះបានធ្វើឱ្យប្រទេសគុយបា ខាតបង់យ៉ាងខ្លាំង និងបង្កការលំបាកជាច្រើនដល់ប្រជាជនគុយបាជាច្រើនជំនាន់»។
ប្រទេសវៀតណាម និងសហគមន៍អន្តរជាតិបានអំពាវនាវឱ្យសហរដ្ឋអាមេរិក បញ្ឈប់ការដាក់ទណ្ឌកម្មជាឯកតោភាគីប្រឆាំង នឹងប្រទេសគុយបា ហើយអនុញ្ញាតឱ្យប្រទេសនេះចូលរួមស្មើភាពគ្នា និងយុត្តិធម៌ក្នុងទំនាក់ទំនងសេដ្ឋកិច្ច និងពាណិជ្ជកម្មស្របតាមច្បាប់អន្តរជាតិ។
លោកបានកោតសរសើរចំពោះឆន្ទៈរបស់ប្រទេសគុយបាក្នុងការបន្តកិច្ចសន្ទនា និងកិច្ចសហប្រតិបត្តិការ ជាមួយសហរដ្ឋអាមេរិកលើបញ្ហាដែលមានការព្រួយបារម្ភ ក៏ដូចជាការចរចាលើបញ្ហាទ្វេភាគី ដោយឈរលើមូលដ្ឋានស្មើភាពគ្នា និងគោរពអធិបតេយ្យភាព និងឯករាជ្យភាពរបស់ប្រទេសនីមួយៗ៕
ប្រភព៖ Vietnam News
រក្សាសិទ្ធិដោយ៖CEN