ពោធិ៍សាត់ៈ លោក ខូយ រីដា អភិបាលខេត្តពោធិ៍សាត់ បានថ្លែងថា មេក្លោងឈ្មួញឈើដ៏ធំក្នុងខេត្តពោធិ៍សាត់ឈ្មោះ កោះ សុភី ហៅតាហយ កំពុងតែគេចខ្លួនក្រោយពីតុលាការបានកោះហៅឱ្យចូលបំភ្លឺរឿងបទល្មើសព្រៃឈើដុះស្លែរាប់ឆ្នាំមក ដែលមានជាប់ពាក់ព័ន្ធទៅនឹងមន្រ្តីផ្សេងទៀតជាច្រើន។
លោកតាន់គឹម សួ បានលើកឡើងថា នៅពីក្រោយភាពជោគជ័យដ៏ធំធេងក្នុងការបង្ក្រាបបទល្មើសព្រៃឈើដែលបង្កឡើងដោយតាហ៊យ គឺលោកប៊ុន តាំងទី ព្រះរាជអាជ្ញារង នៃអយ្យការអមសាលាដំបូងខេត្តពោធិ៍សាត់ ខ្ញុំអាចនិយាយបានថាលោកគឺជាបុគ្គលដ៏សំខាន់នៅក្នុងការបំបែកសំណុំរឿងដ៏ធំមួយនេះ បើមិនមានលោកចូលរួមទេ ខ្ញុំតែឯងពិតជាមិនអាចធ្វើល្អបានដល់ថ្នាក់នេះទេ លោកគឺជាដៃគូដ៏ល្អរបស់ខ្ញុំ សំណាងរបស់ខេត្តពោធិ៍សាត់ហើយដែលមានមន្ត្រីដ៏ល្អបែបនេះ។ សង្ឃឹមថានៅតាមតំបន់ដទៃទៀតនឹងអាចមានមន្ត្រីល្អៗបែបនេះ។
តាហយ ល្បីប្រកបរបកាប់អារជ្រៀកឈើខុសច្បាប់ជាឈ្មួញឈើដ៏ធំដែលសមត្ថកិច្ចមើលរំលងទុកឲ្យគាត់បំផ្លាញតាមអំពើចិត្ត។ ទើបតែពេលនេះបានលោកតាន់ គឹមសួបំបែកសំណុំរឿងតាហយនិងអ្នកពាក់ព័ន្ទឲ្យមហាជនបានដឹងឮ។
លោកតាន់គឹម សួ បានទម្លាយអ្នកពាក់ព័ន្ទបណ្តើរៗហើយ នេះជាសំណេរបស់គាត់ដូចខាងក្រោម៖”
តើលោកភុំ ផៃឌឿម ស្នងការរងទទួលផែនសេដ្ឋកិច្ចម្នាក់នេះមានការជាប់ពាក់ព័ន្ធដ៏ធំជាមួយឧក្រិដ្ឋកម្មព្រៃឈើដែលបង្កឡើងដោយឈ្មោះកោះ សុភី ហៅតាហ៊យ ឬជាមន្ត្រីដែលអសមត្ថភាពជាទីបំផុត?
ខ្ញុំពិតមិនយល់ដែរថាហេតុអ្វីបានជាបុគ្គលដែលសម្បូរទៅដោយរឿងអាស្រូវ(ស្ទើរតែគ្រប់គ្នានៅខេត្តពោធិ៍សាត់ដឹងអំពីរឿងអាស្រូវរបស់គាត់ ធ្លាប់ប្រើប្រាស់អំពើហឹង្សាទៅលើមន្ត្រីក្រោមឱវាទ និងមានការជាប់ពាក់ព័ន្ធជាមួយបទល្មើសជួញដូរព្រៃឈើជាច្រើនករណីទៀត) ដូចបុគ្គលម្នាក់នេះអាចឡើងតំណែងជាស្នងការរងទទួលផែនខាងសេដ្ឋកិច្ចប្រចាំខេត្តពោធិ៍សាត់ដោយរបៀបណាទេ ខ្ញុំសូមមិនបរិយាយច្រើនអំពីរឿងរ៉ាវពីមុនរបស់គាត់ បងប្អូនអាចឆែកស្វែងរកមើលដោយខ្លួនឯងបាន។
ហេតុអ្វីបានជាខ្ញុំគិតថាលោកលោកភុំ ផៃឌឿមមានការជាប់ពាក់ព័ន្ធដ៏ធំជាមួយឧក្រិដ្ឋជនព្រៃឈើឈ្មោះកោះ សុភី ហៅតាហ៊យ ឬលោកជាមន្ត្រីដែលអសមត្ថភាពជាទីបំផុត?
យោងទៅលើករណីថ្មីៗនេះ នៅថ្ងៃទី១៣-ថ្ងៃទី១៥ ខែមិថុនា ក្រោមការបញ្ជាដោយផ្ទាល់ពីឯកឧត្ដមខូយ រីដាអភិបាល នៃគណៈអភិបាលខេត្តពោធិ៍សាត់ និងក្រោមការដឹកនាំរបស់លោកប៊ុង តាំងទី ព្រះរាជអាជ្ញារង នៃអយ្យការអមសាលាដំបូងខេត្តពោធិ៍សាត់ ពួកយើងបានរកឃើញឃ្លាំងស្តុកឈើធំៗចំនួនបីទីតាំងចំកណ្ដាលទីប្រជុំជនឃុំឈើតុំ ស្រុកក្រគរ ខេត្តពោធិ៍សាត់តែម្ដង ហើយនៅក្នុងឃ្លាំងមួយចំនួន គឺមាន៖
-ការរៀបចំម៉ាស៉ីនរៃច្រៀកឈើ និងសិប្បកម្មកែច្នៃឈើខុសច្បាប់(សំឡេងម៉ាស៉ីលឺខ្លាំងណាស់)។
-រកឃើញនូវប្រភេទឈើកម្រជាច្រើន ដែលប្រភេទឈើនិងធំហំឈើទាំងនោះសុទ្ធសឹងតែប្រភេទឈើនាំចេញទាំងអស់។
-រកឃើញនូវកន្ទុយឡានវេអង បាត់ក្បាលឡាន(ជាប្រភេទឡានដឹកជូនឈើចេញទៅក្រៅស្រុក)។
-រកឃើញនូវឡានអាដំរីទឹក១គ្រឿង (២គ្រឿងទៀតគេចខ្លួនបាត់)
-រកឃើញនូវហ្គារាសឡានអាដំរីទឹក ឡានអាដំរីទឹកមួយគ្រឿងផ្សេងទៀតកំពុងតែដំឡើង។
បើលោកស្នងការរងម្នាក់នេះមិនមានការពាក់ព័ន្ធក្នុងករណីនេះទេ តើហេតុអ្វីបានជាបណ្ដោយឲ្យមានឧក្រិដ្ឋកម្មព្រៃឈើកើតឡើងយ៉ាងបើកចំហ និងមានសុខសុវត្តិភាពយ៉ាងពេញទីរាប់សិបឆ្នាំបែបនេះ? កុំប្រកែកថាមិនដឹងខ្យល់អីណា នេះគឺជាបន្ទុកភារកិច្ចរបស់លោក ហើយលោកក៏មានកូនចៅគ្រប់ទិសទីទាំងលើគោក និងលើទឹកដើម្បីឃ្លាំមើល។ បើលោកឆ្លើយថាមិនដឹងខ្យល់អី បានន័យថាលោកមានការពាក់ព័ន្ធយ៉ាងធំជាមួយករណីនេះ ឬជាមន្ត្រីដ៏អសមត្ថភាពជាទីបំផុត។
ក្រោមដំបូលសន្តិភាព មិនគួរណាមានវត្តមានមន្ត្រីបែបនេះបង្កព្យុះភ្លៀងឲ្យថ្នាក់ដឹកនាំឈឺក្បាលបែបនេះទេ។
ជាចុងក្រោយខ្ញុំសូមគោរពស្នើសុំថ្នាក់ដឹកនាំមេត្ដាពិនិត្យលើករណីនេះយ៉ាងយកចិត្តទុកដាក់ជាទីបំផុត”។
ចំណាត់ការរបស់តុលាការខេត្តនេះត្រូវបានធ្វើឡើងក្រោយពេលដែលសំបុកបទល្មើសព្រៃឈើដ៏ធំមួយនៅដែនជម្រកសត្វព្រៃឱរ៉ាល់ស្ថិតក្នុងស្រុកភ្នំក្រវាញ និងកន្លែងពាក់ព័ន្ធផ្សេងទៀត ត្រូវបានលោកអភិបាលខេត្តដឹកនាំកម្លាំងចម្រុះចុះបង្រ្កាបក្រោមការស្នើសុំអន្តរគមន៍ពីសមាគមយុវជនស្រលាញ់ធម្មជាតិ។ ជាលទ្ធផលយ៉ាងហោចណាស់ឈើ ៤០ម៉ែត្រត្រូវបានរកឃើញនិងរឹបអូស។
លោកអភិបាលខេត្តមានប្រសាសន៍ប្រាប់កាសែតក្នុងស្រុកថា៖ «យើងបានរកឃើញឈើដែលបង្កប់លាក់នៅក្នុងឱរ៉ាល់យើង ស្រុកភ្នំក្រវាញហ្នឹង។ យើងនៅកំពុងតែបន្តប្រមូលវត្ថុតាង និងកំពុងតែអនុវត្តច្បាប់ហើយតុលាការបានចេញដីកាហៅឱ្យចូលខ្លួនទៅតាមការចោទប្រកាន់ជំនាញរដ្ឋបាលព្រៃឈើ»។ «មុខសញ្ញានេះយើងរកយូរមកហើយ ដែលលួចលាក់ និងមានការឃុបឃិតជាមួយនឹងមន្រ្តីមួយចំនួន។ យើងមិនទាន់ដឹងថា មុខសញ្ញាណាខ្លះដែលពាក់ព័ន្ធនោះទេ។ យើងកំពុងតែហៅទី១ សាម៉ីខ្លួនមកសិន។ សាម៉ីខ្លួនគេចខ្លួនបាត់ហើយ ប្រហែលជាដីកាហ្នឹងមិនទាន់ដល់សាម៉ីខ្លួនទេ។
គេដាក់មេធាវីអីដែរ.. មកដោះស្រាយទៅ អាហ្នឹង ផ្លូវច្បាប់គេអនុវត្តហើយ»៕ រក្សាសិទ្ធដោយ ៖ សុទ្ធលី
